“Anar müəllim, Vüqar müəllim, sizi niyə təyin ediblər bu vəzifələrə? Bir dəfə bu bina ilə maraqlanmamısınız. Öhdəsindən gələ bilmirsinizsə, özəlləşdirin binanı, hər kəs öz işini bilsin…” 

Bu sözləri valideyn himayəsindən məhrum olmuş şəxslərin yaşadığı “Məzun evi” Sosial Müəssisəsinin sakini Fazil İsmayılov sosial media hesablarında əmək və əhalinin sosial müdafiəsi naziri Anar Əliyev və Sosial Xidmətlər Agentliyinin İdarə Heyətinin sədri Vüqar Behbudova xitabən deyib.

Onun sözlərinə görə, yaşadığı müəssisəyə 8 aydır isti su və bu ilin noyabrın 15-dən verilməli olan istilik verilmir. 

Əmək və Əhalinin Sosial Müdafiəsi Nazirliyinin tabeliyində olan “Məzun Evi” Sosial Xidmətlər Agentliyinin uşaqlar üçün sosial xidmət və təhsil müəssisələrinin məzunları üçün açılıb. Masazırda yerləşən binanın 2016-cı ildə baş tutan açılışında birinci vitse-prezident Mehriban Əliyeva da iştirak edib. 

“Toplum TV”-yə danışan “Məzun Evi” sakinləri də F.İsmayılovun ictimailəşdirdiyi problemləri təsdiqləyiblər. Onlar deyib ki, bununla bağlı müraciətlərinə şifahi olaraq baxılacağı deyilir, lakin tədbir görülmür:

“Hər il bu problem yaşanır, amma adətən gec də olsa həll edirdilər. Bu il isə ümumiyyətlə bizi yola verirlər. Bütün aidiyyatı qurumlara şikayət etmişik, hamısı qısaca deyir ki, gözləyin, düzələcək. Nə vaxt? Bu gün-sabah qış qurtarır, hələ də istilik yoxdu. Camaat kurtka ilə yatır, vedrədə su qızdırıb çimir. Yığışıb nazirliyin önünə getmək istəyəndə də polislə hədələyirlər. Bizim polislə, dövlətlə problemimiz yoxdu. Dövlət bu binanı tikib, bizə verib, indi nazirliyin öhdəliyidir ki, kommunal xidmətləri təmin etsin. Amma baxmırlar. Başqa problemlər də var. Liftlərdən cəmi biri işləyir. O da sıradan çıxanda, əlil adamlarıq, bir-birimizin qoluna girib, qalxırıq yuxarı.” 

Sakinlər problemlərlə bağlı prezident İlham Əliyevə və vitse-prezident M.Əliyevaya müraciət üçün imza topladıqlarını bildiriblər. 

“Bizim problemimizi başqa heç kim həll etməyəcək”, - onlar deyir. 

Açılışında 365 məzunun mənzillə təmin olunduğu müəssisədə hazırda 700-yə yaxın sakin yaşayır. 

Mövzu ilə bağlı adı çəkilən qurumların mövqeyini dərc etməyə hazırıq.