Azərbaycandan kənarda yaşayan vətəndaş cəmiyyəti üzvləri və media nümayəndələri Avropa Parlamentinə müraciət ünvanlayıblar.

“Toplum TV” ilə paylaşılan müraciətdə onlar parlament üzvlərinin diqqətini Azərbaycanda “sürətlə pisləşən insan hüquqları vəziyyətinə” çəkmək və Avropa İttifaqının (Aİ) prinsipial mövqe ortaya qoymasında Avropa Parlamentinin aparıcı rol oynamasını istəyiblər.

Müraciətçilər bildiriblər ki, Azərbaycan hakimiyyəti müstəqil vətəndaş cəmiyyəti, media, siyasi müxalifət və bütün tənqidi səsləri “aradan qaldırmaq məqsədilə sistem qurub”.

Onlar hazırda Azərbaycanda 400-dən çox siyasi məhbusun olduğunu, 2023-cü ilin noyabrından etibarən “Toplum TV” də daxil olmaqla müstəqil media orqanlarının fəaliyyətinə qadağa qoyulduğunu qeyd ediblər.

Müraciətçilər digər təqiblərə nümunə kimi AXCP sədri Əli Kərimlinin həbsi, ölkədən kənarda yaşayan tənqidçilərə qarşı cinayət işlərinin açılması, beynəlxalq media qurumlarının akkreditasiyalarının ləğv edilməsi və vəkil Zabil Qəhrəmanovun həbsini sadalayıblar.

Müraciətdə qeyd olunub ki, Aİ-nin Azərbaycandakı təqiblərə “səssizliyi razılıq əlaməti kimi başa düşülür”.

“Azərbaycanın əsas investoru və ən böyük ticarət tərəfdaşı olmasına baxmayaraq, Aİ bu repressiyanı dayandırmaq üçün öz təsir imkanlarını istifadə etməyib. Bakı səfərlərində yüksək səviyyəli görüşlərdə insan hüquqları mövzusu açıq müzakirə edilməyib və müstəqil fəallarla görüşlər keçirilməyib. 2025-ci ilin aprelində yüksək nümayəndə Kaya Kallas enerji sahəsində əməkdaşlığı tərifləyib, lakin insan hüquqlarını açıq şəkildə qeyd etməyib. Bu səssizlik Bakıda siyasi siqnal kimi başa düşülüb ki, daha çox repressiya da nəticəsiz qalacaq”, - deyə vurğulanıb.

Müraciətçilər Aİ-nin Azərbaycandakı təqiblərə münasibətinin Belarus və Gürcüstanla bağlı “prinsipial reaksiyası ilə kəskin ziddiyyət” təşkil etdiyini bildiriblər.

Bununla belə, onlar Avropa Parlamentinin Azərbaycandan olan nümayəndə heyətini etibarsız sayması barədə qərarını, həmçinin sanksiyalar və 2022-ci il enerji memorandumunun dayandırılması ilə bağlı çağırışları alqışladıqlarını qeyd ediblər.

“Lakin bu tövsiyələr Avropa Komissiyası və Aİ Xarici Əlaqələr Xidməti tərəfindən həyata keçirilməyib və bu da Azərbaycan vətəndaş cəmiyyətini təcrid edib və müdafiəsiz qoyub”, -  müraciətdə vurğulanıb.

Azərbaycanlı vətəndaş cəmiyyəti üzvləri Avropa Parlamentindən Azərbaycan-Aİ münasibətlərinə dair “açıq insan hüquqları meyarlarını ehtiva edən aydın yol xəritəsini göstərən” qərar qəbul etməsini istəyiblər və digər tələblər irəli sürüblər.

“Artıq Azərbaycanda demək olar ki, heç bir müstəqil vətəndaş cəmiyyəti təşkilatı və media qurumu fəaliyyət göstərmir. Mühacirətdə olan fəallar artan risklərlə üzləşirlər və ABŞ-dən gələn dəstək dayandırılıb.

İndi yalnız Avropa İttifaqı bu məsələyə təsir etmək və cavab vermək imkanına malikdir. Avropa Parlamentindən güclü mövqe, Azərbaycan hakimiyyətinə, vətəndaş cəmiyyətinə və regiona vacib mesaj verəcək: Aİ-nin insan hüquqlarına və qanun aliliyinə bağlılığı müzakirə olunmur”, - deyə onlar müraciəti sonlandırıblar.