Dövlət Təhlükəsizliyi Xidməti (DTX) və Daxili İşlər Nazirliyi (DİN) Qusarda anti-terror əməliyyatı keçirib.

Nəticədə 8 nəfərin öldüyü, iki nəfərin yaralandığı deyilir.

DTX-nın bu haqda yaydığı məlumata görə, əvvəllər “Meşə qardaşları" adlı terror qruplaşmasının fəaliyyətində iştirak etdiyinə görə məhkum olunmuş  şəxsin Qusar rayon sakinləri ilə cinayət əlaqəsinə girməsi, onların birlikdə rayon ərazisində terror aktları hazırlamaları, həmin rayonun Hil, Cibir və Yasab kəndlərini əhatə edən meşə massivində yeraltı sığınacaqlar yaratmaları, bu sığınacaqları silah-sursat, partlayıcı maddələr, texniki qurğular və digər zəruri ləvazimatlarla təchiz etmələri təsbit olunub. 

Bildirilir ki, qruplaşma üzvlərindən birinin istintaqa cəlb edilməsi məqsədilə keçirilmiş əməliyyat zamanı o, xüsusi təyinatlı əməkdaşlara silahlı müqavimət göstərərək 2 ədəd “RGO-78” markalı əl qumbarası atıb, nəticədə xüsusi təyinatlılardan biri yaralanıb, həmin şəxs isə "zərərsizləşdirilib". 

Daha 4 nəfərin isə Cibir kəndi yaxınlığında gizli sığınacaqda partlayıcı vasitəni işə salarkən öldüyü, bir nəfərin Hil kəndinin yaxınlığında yerləşən fermada, iki nəfərin isə Hil kəndi ərazisində hüquq-mühafizə orqanlarının əməkdaşlarına qarşı silahlı müqavimət göstərərkən "zərərsizləşdirilmələri" deyilir.

Daha bir nəfərin partlayıcı qurğuları Qusarda yerləşən “Motel” adlı qonaq evində və onun yaxınlığındakı avtoyuma məntəqəsinin damında gizlətməsi və həmin qurğuları partlaması nəticəsində xəsarət aldığı bildirilir.

Azərbaycan Respublikasının qanunvericiliyi ilə nəzərdə tutulmayan silahlı birləşmənin fəaliyyətində iştiraklarına, o cümlədən bu silahlı birləşməni partlayıcı maddələrlə və digər ləvazimatlarla təchiz etmələrinə əsaslı şübhələrlə altı nəfər haqda Cinayət Məcəlləsinin 28,214.2.1, 28,214.2.3, 28,214.2.6-cı (cinayətkar birlik (cinayətkar təşkilat) halında odlu silahdan və silah qismində istifadə olunan predmetlərdən istifadə etməklə dini düşmənçilik, dini radikalizm və dini fanatizm zəminində terrorçuluğa hazırlıq) və digər maddələri ilə istintaqı aparılan cinayət işi üzrə təqsirləndirilən şəxs qismində məsuliyyətə cəlb edilərək, məhkəmənin qərarı ilə barələrində həbs qətimkan tədbiri seçilib.

Hələlik həmin şəxslərin yaxınları ya da vəkilləri deyilənlərə münasibət bildirməyiblər. 

DTX-nın yaydığı məlumata görə, sığınacaqlardan partlayıcı qurğuların hazırlanması üçün nəzərdə tutulan torf, aseton, detonatorlar, məsafədən idarə edilə bilən partlayıcı mexanizmlər, qəlpə qismində istifadə edilən armatur və qurğuşun hissələri, 2 ədəd “Kalaşnikov” avtomatı, 3 ədəd ov tüfəngi, patronlar və avtomat güllələri, eləcə də beynəlxalq səviyyədə terror təşkilat kimi tanınmış qanunsuz silahlı birləşmənin simvolu olan bayraq götürülüb