Rüfət Səfərov Cinayət Məcəlləsinin 221.1(xuliqanlıq) və 178.3.2-ci (dələduzluq, külli miqdarda ziyan vurmaqla törədildikdə) maddələri ilə şübhəli şəxs qismində saxlanılıb. Bu haqda Toplum TV-yə onun vəkili Bəhruz Bayramov deyib.

Vəkilin sözlərinə görə, 48 saat ərzində ya ona ittiham verilərək məhkəməyə çıxarıla bilər ya da sərbəst buraxılmalıdır. 

***

Hüquq müdafişəçisi Rüfət Safarov saxlanılıb. Vəkili Elçin Sadıqov deyir ki, hazırda o dindirilir.

“Həbs edib gətiriblər Binəqədi Rayon Polis İdarəsinə. Özü deyir ki, avtomobilini qarajda saxlarkən tanımadığı şəxs ona hücum edib, daha sonra işdə şahid qismində çıxış edəcək polislər tökülüşüblər. İndi onu gətiriblər idarəyə. Həmin şəxs də bildirib ki, Rüfətin atasından torpaq alıb, 58 min manata. Guya sonra da torpağın ikinci hissəsini almaq üçün Rüfətə pul verib. Amma Rüfətlə görüşməyiblər, Rüfət deyir ki, həmin adamı  görməmişəm, tanımıram”, Elçin Sadıqov bildirir.

Vəkilin sözlərinə görə, Rüfət Səfərov saxlanılmasını iki gün sonra ABŞ-da hüquq müdafiəçisi kimi mükafat alması ilə əlaqələndirir.

“O, ABŞ Dövlət Departamenti tərəfindən mükafata layiq görülüb. İki gün sonra ABŞ dövlət katibi cənab Blinken ona mükafat təqdim etməlidyidi. Deyir ki, bundan xəbər tutan Azərbaycan hakimiyyəti onunla bağlı uydurma cinayət işini düzüb-qoşub”.

Rüfət Səfərovun anası Tahirə Tahirqızı da belə bir hadisəni gözlədiklərini deyir.

Az öncə Rüfət Səfərovun adından Facebookda paylaşım edilib. O, iki gün sonra ABŞ-a getməli olduğunu, ilin hüquq müdafiəçisi kimi mükafata layiq görüldüyünü yazır. Buna görə ABŞ-ın Azərbaycandakı səfirinə və namizədliyini dəstəkləyən ABŞ Dövlət Katibi Entoni Blinkenə  təşəkkür edir.

“Rəsmi Bakı mənim həmin mükafatı almağımın qarşısını almaq və hüquq müdafiəçiliyimə görə məni cəzalandırmaq məqsədiylə məni həbs etdi”.

Səfərov sonda ağır parkinson xəstəsi olan və yenicə əməliyyatdan çıxan  atasının həyatının tükdən asılı olduğunu yazır və azadlığa çıxana qədər atasının onu gözləməsini xahiş edir.

***

Hüquq müdafiəçisi Rüfət Səfərovun saxlanıldığı deyilir. Daxili İşlər Nazirliyindən Toplum TV-yə onun  Binəqədi Rayon Polis İdarəsinin 5-ci bölməsində olduğunu təsdiqləyiblər. 

DİN-dən bildirilib ki, torpaq alqı-satqısı ilə əlaqədar Rüfət Səfərovla bir nəfər arasında münaqişə olub. Bununla bağlı araşdırma aparılır.

Onun saxlanılması barədə əlavə məlumat almaq mümkün olmayıb.

R.Səfərov hüquq müdafiəçisi kimi həbsdəki siyasi-ictimai faəlların, jurnalistlərin hüquqlarının pozulmasını daim diqqətdə saxlayır, hakimiyyətin insan hüquqları sahəsindəki siyasətinin tənqidçisi kimi tanınır.