Avropada Təhlükəsizlik və Əməkdaşlıq Təşkilatının (ATƏT) Nazirlər Şurası Dağlıq Qarabağ münaqişəsinin həllindən məsul olan Minsk Qrupunun buraxılmasına qərar verib. 

Bu barədə sentyabrın 1-də ATƏT-in sədri Elina Valtonen və baş katibi Feridun Sinirlioğlu bəyanatlarında bildiriblər. 

Onlar Azərbaycan və Ermənistanın birgə müraciətindən sonra Minsk Qrupu və əlaqədar strukturların bağlanmasına dair Nazirlər Şurasının qərarının qəbulunu müsbət qarşılayıblar. 

“Ermənistan və Azərbaycana sülh və münasibətlərin normallaşdırılması istiqamətində əldə etdikləri tarixi razılaşmalar və onların sürətli icrasına başlamaq barədə qətiyyətli qərarlarına görə bir daha səmimi təbriklərimi çatdırmaq istəyirəm. Mən onların Birgə Müraciətinə dərhal cavab verdim və bu prosesdəki əla əməkdaşlıqlarına görə tərəflərə dərin minnətdarlığımı bildirmək istəyirəm. Həmçinin, konsensusa nail olunmasında iştirakçı dövlətlərin nümayiş etdirdiyi əməkdaşlıq ruhunu da yüksək qiymətləndirirəm", – Valtonen bildirib.

“Bu, on illərlə davam edən münaqişə və etimadsızlıqdan sonra diplomatiyanın nələrə nail ola biləcəyini göstərən tarixi hadisədir. Bu, tərəflər arasında ortaq məxrəcə gəlmək iradəsi olduqda razılaşmanın mümkün olduğunu sübut edir,” – Sinirlioğlu vurğulayıb.

Bəyanata görə, ATƏT-in fəaliyyətdə olan sədri və baş katibi Azərbaycan, Ermənistan və regionda "davamlı sülh və sabitliyə gətirən səylərə dəstək verməkdə sarsılmaz öhdəliklərini bir daha təsdiqləyiblər". 

Avqustun 8-də Vaşinqtonda Azərbaycan və Ermənistan xarici işlər nazirləri Minsk Qrupunun buraxılması üçün birgə müraciət imzalayıblar. 

Nazirlər Şurasının qərarı ATƏT-in bütün 57 iştirakçı dövləti tərəfindən konsensus əsasında qəbul olunub.

ATƏT-in bəyanatında bildirilir ki, bu qərardan sonra yalnız aktivlərin və avadanlıqların təhvil verilməsi kimi inzibati funksiyalar davam edəcək və buraxılma prosesi ən gec 1 dekabr 2025-ci ilə qədər başa çatdırılacaq. 

1992-ci ildə Birinci Qarabağ Müharibəsi zamanı yaradılan Minsk Qrupuna Fransa, Rusiya və ABŞ həmsədrlik edib. 

Minsk Qrupu 2020-ci ildə baş tutan İkinci Qarabağ müharibəsinədək Ermənistan və Azərbaycan arasında aparılan danışıqlar üçün əsas platforma olub. 

Azərbaycan prezidenti İlham Əliyev dəfələrlə çıxışlarında Minsk Qrupunu tənqid edib, qurumun “fəaliyyətsizliyinin” müharibənin başlaması üçün əsas səbəblərdən biri olduğunu deyib. 

Minsk Qrupunun ləğvi Azərbaycanın Ermənistanla sülh müqaviləsinin imzalanması üçün irəli sürdüyü əsas şərtlərdən biri olub. Martın ortalarında mətni razılaşdırılan həmin müqavilə avqustun 8-də Vaşinqtonda paraflansa da, hələ imzalanmayıb.