Böyük Britaniya Rusiyanın iki ən böyük neft şirkətləri "Lukoil" və "Rosneft"ə sanksiya tətbiq edib. 

Şirkətlərin adları Britaniya hökumətinin oktyabrın 15-də dərc etdiyi yeni sanksiya paketində yer alıb. Paketdə ümumilikdə 90 fərd, şirkət və neft tankeri hədəfə alınıb. 

"Putinin müharibəsinin əsas maliyyə mənbələrinə zərbə vuran 90 yeni sanksiya birbaşa olaraq dünyanın ən böyük enerji şirkətlərindən olan “Rosneft” və “Lukoil”i hədəf alır", - hökumət bəyanatda bildirib. 

Hökumətin məlumatına görə, bu iki şirkət birlikdə gündə 3,1 milyon barel neft ixrac edir. Təkcə “Rosneft”in qlobal neft hasilatının 6 faizinə və Rusiyanın ümumi hasilatının təxminən yarısına cavabdeh olduğu bildirilir. 

Sanksiyaya məruz qalanlar siyahısında Çindəki dörd neft terminalı, Rusiya neftini daşıyan “kölgə donanması”na aid 44 tanker və təkcə 2024-cü ildə 5 milyard dollardan çox dəyərində 100 milyon barel Rusiya xam nefti idxal etmiş “Nayara Energy Limited” şirkəti də var. 

"Bugünkü addım hökumətin Putinin gəlir mənbələrini kəsmək əzmində olduğunu göstərir – hədəfdə həm rus şirkətləri, həm də onların beynəlxalq tərəfdaşları var", - deyə qeyd olunub.  

Britaniya xarici işlər naziri İvet Kuper oktyabrın 15-də parlamentdə çıxışı zamanı Rusiya Ukraynanın işğalını dayandırmayana qədər ölkəsinin sanksiyalardan çəkilməyəcəyini deyib. 

"Ukrayna üçün bu həlledici anda Avropa addımlarını gücləndirir. Böyük Britaniya olaraq müttəfiqlərimizlə birlikdə Putinə təzyiqi artırırıq,  onun neftinə, qazına və “kölgə donanmasına” qarşı çıxırıq və o, uğursuz işğal müharibəsindən imtina edib sülhə ciddi yanaşana qədər geri çəkilməyəcəyik.
Müharibə iqtisadiyyatı çökməkdə, xalqı əzab çəkməkdə və ordusu ağlasığmaz itkilər verməkdə olsa da, o, hələ də günahsız mülki şəxslərə qarşı dronlar və raketlər göndərməkdə davam edir", - o qeyd edib. 

"Ukraynanın təhlükəsizliyi bütövlükdə Avropanın, eləcə də Böyük Britaniyanın təhlükəsizliyi və sabitliyi üçün mühümdür. Bu gün atılan addım Ukraynada ədalətli və davamlı sülhə, həmçinin daha təhlükəsiz bir Böyük Britaniyaya doğru növbəti addımdır. Avropa ölkələri ilə birgə Rusiya təcavüzünə qarşı gördüyümüz tədbirlər bizi öz evimizdə daha güclü edir", - Kuper əlavə edib. 

Böyük Britaniya oktyabrın 15-də, həmçinin, mayeləşdirilmiş təbii qaz ("LNG") daşınması üzrə ixtisaslaşmış yeddi tankeri və Çinin Beyxay limanındakı "LNG" terminalını sanksiya altına alıb. Beyxay terminalı Rusiyanın "Arctic LNG2" terminalından "LNG" idxal edir. Bu terminal özü 2024-cü ilin fevralında Böyük Britaniya tərəfindən sanksiyaya məruz qalıb. 

"Kremlə gedən maliyyə axınını daha da məhdudlaşdırmaq üçün bu gün elan edirik ki, rus mənşəli xam neftdən emal olunmuş neft məhsullarının üçüncü ölkələrdən idxalı qadağan olunacaq", - bəyanatda deyilir. 

Yeni sanksiyalar neft sənayesi ilə məhdudlaşmayıb. Rusiya dronları və raketləri üçün vacib elektronik hissələr təmin edən, Tailand, Sinqapur, Türkiyə və Çində  yerləşən şirkətlər də hədəfə alınıb. 

Britaniya daha öncə də Rusiyanın üçüncü və dördüncü böyük neft şirkətləri olan "Gazprom Neft" və "Surgutneftegas"-ı bu ilin yanvarında sanksiyaya məruz qoyub. 

"Lukoil"in təsisçisi və səhmlərinin böyük hissəsinə sahib olan azərbaycanlı milyarder Vahid Ələkbərov özü isə hələ 2022-ci ilin aprelində sanksiyaya məruz qalıb. 

Böyük Britaniya "Böyük Yeddilik ölkələri" arasında “Lukoil”a sanksiya tətbiq edən ilk ölkə olub. Avropa İttifaqı isə hazırda bu şirkətə qarşı sanksiya tətbiqini müzakirə edir. ABŞ isə hələlik bu şirkətlərin heç birinə sanksiya tətbiq etməyib.

Britaniyanın daha əvvəl sanksiya tətbiq etdiyi azərbaycanlılar arasında "Kiyevskaya Ploşad” şirkətinin direktorlar şurasının sədri Qod Nisanov, "Coral Energy Group" neft ticarəti şirkətinin direktorları Əhməd Kərimov, Anar Mədətli, Tələt Səfərov, Etibar Eyyub, Tahir Qarayev, Türkiyənin “Mastel Makina” şirkətindən Şanlık Şükürov var. Hökumət, həmçinin, Azərbaycana məxsus "Zəngəzur" neft tankerini sanksiyaya məruz qoyub.