Kreml Litvanın Avropa Birliyinin sanksiyalarına məruz qalan malların Kalininqrad vilayətinə tranzitini dayandırmaq barədə qərarını qanunsuz adlandırıb.

"İnterfaks" xəbər verir ki, bu barədə Kremlin mətbuat xidmətinin rəhbəri  Dmitri Peskov jurnalistlərə açıqlamasında bildirib. Onun sözlərinə görə, Moskva cavab tədbirləri barədə qərar qəbul etməzdən əvvəl bir neçə gün ərzində məsələni təhlil edəcək.

"Bu qərar həqiqətən görünməmiş, bütün xətlərin keçilməsidir. Biz başa düşürük ki, bu, Avropa Birliyinin tranziti də sanksiyalara daxil etməsiylə bağlıdır. Biz də bunu qanunsuz hesab edirik", - Peskov jurnalistlərə deyib. 

https://toplum.tv/dunya/ukraynada-rus-mahnilari-ve-kitablari-qadagan-olunub

"Bu mənada vəziyyət çox ciddidir, hər hansı tədbir və qərar qəbul edilməzdən əvvəl çox dərin təhlil tələb olunur. Bu dərin təhlil yaxın bir neçə gün ərzində aparılacaq", - Kreml sözçüsü vəd verib.

Jurnalistin "belə olan halda Rusiya vilayətinin blokadasından danışmaq olarmı" sualına Peskov "Bu, əlbəttə ki, blokadanın bir elementidir", - deyə cavab verib.

Məsələylə əlaqədar olaraq, bu gün, iyunun 20-də Rusiya Xarici İşlər Nazirliyi də məlumat yayıb. 

Bu gün Litvanın müvəqqəti işlər vəkili Rusiya Xarici işlər Nazirliyinə (XİN) çağırılıb və ondan Kalininqrada tranzit sahəsində qoyula məhdudiyyətlərin dərhal aradan qaldırılması tələb olunub.

"Biz Litva tərəfinin beynəlxalq hüququn öhdəliklərini, ilk növbədə Kalininqrad vilayəti ilə Rusiya Federasiyasının qalan əraziləri arasında tranzitlə bağlı Rusiya Federasiyası və Avropa İttifaqının 2002-ci il tarixli Birgə Bəyanatını pozan təxribat xarakterli addımlarını açıq düşmənçilik kimi qiymətləndirdiyimizi bildirdik.

Bəyan etdik ki, əgər yaxın gələcəkdə Kalininqrad vilayəti ilə Rusiya Federasiyasının digər əraziləri arasında Litva ərazisindən keçən yük tranziti tam həcmdə bərpa olunmazsa, onda Rusiya öz milli maraqlarını qorumaq üçün cavab tədbirləri görmək hüququnu özündə saxlayır”, -nazirliyin məlumatdına qeyd olunub.

Rusiyanın digər regionlarından Kalininqrad vilayətinə dəmir yolu ilə yüklərin daşınmasının Litvanın hakimiyyət orqanları tərəfindən əhəmiyyətli dərəcədə məhdudlaşdırılacağı barədə faktı ötən cümə günü Kanininqrad vilayətinin qubernatoru Anton Əlixanov bildirib.

"Litva dəmir yolları Kalininqrad dəmir yoluna sabah saat 00:00-dan (18 iyun - İF) Avropanın sanksiyalarına məruz qalan malların Kalininqrad vilayətinə və bu bölgədən tranzitini dayandıracaqları barədə məlumat verib, - Əlixanov Teleqram kanalında yazıb.

Onun sözlərinə görə, ilkin hesablamalara görə, bu, bütün tranzit yüklərin 40%-dən 50%-ə qədərinə aiddir. Bunlar tikinti materialları, sement, metallar və digər vacib mallardır.