ABŞ prezidenti Donald Tramp administrasiyasının Ukraynaya “Patriot” hava hücumundan müdafiə sistemləri üçün raket istehsalına lisenziya verib-verməyəcəyinə hələ də əmin olmadığını bildirib.

Tramp bu barədə “Financial Times” qəzetinin müxbirinə açıqlamasında deyib. Onun sözlərinə görə, ABŞ administrasiyası hazırda məsələni nəzərdən keçirir.

ABŞ prezidenti “Patriot” sistemlərini “unikal silah” adlandırıb və onların istehsalı üçün lisenziyanın kimə verilməsi məsələsində “ehtiyatlı olmaq lazım olduğunu” vurğulayıb. O qeyd edib ki, ABŞ adətən belə lisenziyalar vermir.

Trampın açıqlaması onun Ukrayna prezidenti Volodimir Zelenski ilə Ağ Evdə görüşündən iki gün sonra baş verib. V.Zelenski görüşü “yaxşı” adlandırıb. Onun sözlərinə görə, görüş zamanı digər məsələlərlə yanaşı, Rusiyanın ballistik raketlərinə qarşı mübarizə tədbirləri də müzakirə olunub. “Patriot” sistemləri əsasən bu tip raketlərin qarşısının alınması üçün istifadə edilir.

Ağ Ev isə görüş zamanı bu məsələnin müzakirə edildiyini rəsmi şəkildə açıqlamayıb.

Tramp son günlər müharibənin mümkün qədər tez başa çatdırılmasına çalışdığını dəfələrlə vurğulayıb. O, həm Rusiyadan, həm də Ukraynadan bununla bağlı addımlar atmağı gözlədiyini bildirib: “Bizə raketlər yox, sülh lazımdır”.

ABŞ prezidenti həmçinin onun xüsusi nümayəndələri Stiv Uitkoff və Jared Kuşnerin avqust ayında ilk dəfə Kiyevə səfər edəcəklərini təasdiqləyib.

İyulun əvvəlində Ankarada keçirilən NATO sammitində Zelenski ilə görüşən Tramp ABŞ-nin Ukraynaya “Patriot” sistemləri üçün raket istehsalına lisenziya verə biləcəyini bildirmişdi.

Hazırda Ukrayna “Patriot” sistemləri üçün kifayət qədər raketə malik olmadığı üçün Rusiyanın ballistik raketlərinin qarşısını tam şəkildə ala bilmir. Zelenskinin sözlərinə görə, Rusiya

Ukraynaya həyata keçirdiyi hər böyük hücum zamanı 30-40 ballistik raketdən istifadə edir və ay ərzində belə hücumların sayı 3-5 arasında dəyişir.

“The Guardian” nəşrinin məlumatına görə, Rusiya iyulun 26-na keçən gecə ballistik raketlə ABŞ-nin “Terminal Autonomy” şirkətinin pilotsuz uçuş aparatlarının istehsal etdiyi zavoduna zərbə endirib və zavodu “məhv edib”.