İlin son günlərində Dövlət Statistika Komitəsi dayanıqlı inkişafla bağlı yeni hesabat açıqladı. Sənəddə diqqəti çəkən maraqlı göstəricilərdən biri də ümumi istifadəyə açıq olan abadlaşdırılmış şəhər ərazilərinin miqyasıdır. Belə ərazilərə aşağıdakılar daxildir:

- yaşayış binalarının və digər tikililərin həyətlərindəki yaşıllıqlar;

- parklar və şəhər meşələri;

- uşaq meydançaları;

- meydanlar (fəvvarələr olan meydanlar, heykəllərin olduğu meydanlar və s.);

- idman meydançaları;

- dəniz, göl və çayların sahilləri;

- sahilyanı qoruqlar;

- icma bağları;

- parkletlər (səkilərdə, yol döngələrində, parklama yerlərində oturacaq və yaşıllıqlarla təchiz edilmiş kiçik ictimai məkanlar) və s.

Hesabatdan aydın olur ki, hazırda Bakı şəhərinin ümumi ərazisinin cəmi 7,6%  açıq və abadlaşdırılmış sahələrdən ibarətdir. Bu göstərici Sumqayıt şəhərində 17,5%, Gəncə şəhərində 15,1% təşkil edir.

Açıq ictimai məkanların sahəsi baxımından Bakının nə qədər yoxsul bir şəhər olduğu MDB ölkələrinin paytaxtları və böyük şəhərlərilə müqayisədə daha aydın görünür.

Məsələn, deyd olunan göstəricinin səviyyəsi Moskvada 24,6%, Sankt-Peterburqda 22,4%, Kiyevdə 19,1%, Astanada 18%, Almatada 19%, Bişkəkdə 17%, Aşqabadda 16%, Daşkənddə 15,4%, Düşənbədə 12% təşkil edir.

Hesabatda abad ictimai məkanlarla bağlı başqa bir göstərici də var: əhalinin həmin məkanlara əlçatanlıq səviyyəsi.

Bu göstərici belə ərazilərə maksimum 400 metrdən çox olmayan məsafədə yaşayan əhalinin ümumi şəhər əhalisinə nisbəti olaraq hesablanır. Sənəddə təqdim olunan statistikaya görə, Bakı əhalisinin təxminən üçdə biri (36%) ictimai abad məkanlara əlverişli məsafadə yaşayır.

Hər iki göstərici Bakıda park və yaşıllıqların nə qədər az, tikinti sıxlığının nə qədər yüksək olduğunu göstərir.

Avropa Şurasının 20 ildir tələb etdiyi kimi, Bakıda seçkili və kollegial idarəetmə sistemi tətbiq edilməyənə qədər vəziyyət dəyişməyəcək. Hökumət bundan sonra neft pulları hesabına hətta 100 milyard dollar xərcləyib dəbdəbəli binalar tikdirsə belə, Bakını yaşanası yerə - “insan dostu şəhər”ə çevirə bilməyəcək.

“Toplum TV”