Hüquq müdafiəçisi Rüfət Səfərovun anası Tahirə Tahirqızı yanvarın 6-da şahid qismində ifadə vermək üçün istintaqa dəvət edilib. O, Amerikanın Səsinə deyib ki,  Bakı şəhər Baş Polis İdarəsinə getsə də, ifadə verməkdən imtina edib.

“Müstəntiqə bildirdim ki, oğlumu şərləyib həbs ediblər. Hər hansı bir sübut olmayan cinayət işi üzrə mən necə ifadə verə bilərəm”, T.Tahirqızı bildirib. 

O, ölkədən çıxışına qadağa qoyulmasının səbəbi ilə də maraqlandığını, amma  konkret cavab ala bilmədiyini söyləyib. 

Tahirə Tahirqızı bildirib ki, həyat yoldaşı ağır parkinson xəstəsidir və hər altı aydan bir İstanbulda əməliyyat olunduğu klinikada müayinədən keçir. 

“Son hadisələr, oğlumuzun həbs edilməsi onun xəstəliyinin daha da kəskinləşməsinə səbəb olub. Buna görə yanvarın 7-də İstanbula getmək üçün təyyarəyə qabaqcadan bilet almışam. Mənə son anda məlum olub ki, Daxili İşlər Nazirliyi ölkədən çıxışıma qadağa qoyub. Biz pensiya ilə dolanırıq. Bu bilet pulu belə bizim üçün böyük məbləğdir”, o qeyd edib.

Tahirə Tahirqızı hər dəqiqə istintaq orqanından zəng gözlədiklərini, həyat yoldaşını Türkiyəyə müayinəyə aparmaq üçün ölkədən çıxışına qoyulan qadağanın götürləcəyinə ümid etdiyini bildirir.

Ailə üzvlərinin dediklərinə görə, yanvarın 6-da Rüfət Səfərov ailəsi ilə telefonla danışıb, o, atasının səhhəti ilə bağlı narahat olduğunu deyib. 

“Bizim ölkədən çıxışımıza qoyulan qadağa isə ona çox ağır təsir edib. O bunun humanizmə uyğun olmadığını dedi”, ana söyləyib.

Rüfət Səfərov ötən il dekabrın 3-də saxlanılıb. Ona qarşı Cinayət Məcəlləsinin 221.1 (xuliqanlıq) və 178.3.2 (dələduzluq-külli miqdarda ziyan vurmaqla törədildikdə) maddələri ilə ittiham irəli sürülərək barəsində 4 aylıq həbs qətimkan tədbiri seçilib.

Səfərov ittihamları rədd edib, həbsini insan hüquqları sahəsindəki fəaliyyəti, ABŞ Dövlət katibinin “İnsan Hüquqları Müdafiəçisi Mükafatı”na layiq görülməsi ilə izah edib.

Hüquq müdafiəçiləri ölkədə 300-dən çox siyasi məhbus olduğunu bildirir. 

Rəsmi Bakı insan haqları sahəsindəki durumla bağlı yerli və beynəlxalq tənqidləri rədd edir, ölkədə heç kimin siyasi fəaliyyətinə görə təqib olunmadığını,  bütün hüquq və azadlıqların təmin olunduğunu bildirir.