Kənd təsərrüfatı nazirinin müavini İlhamə Qədimova bu yaxınlarda kadr çatışmazlığından şikayətlənib. 

O, dekabrın 19-da Milli Məclisin Aqrar siyasət komitəsində keçirilən dinləmədə deyib ki, kadr çatışmazlığına görə xaricdən mütəxəssis gətirmək məcburiyyəti yaranır. 

“Yaşlanan kadrların sistemdən çıxması ilə boşluq yaranır və bu boşluq yalnız ali təhsil vasitəsilə, yəni dördillik təhsilə kifayət qədər tələbə cəlb etməklə aradan qaldırıla bilər. Bu isə qeyri-mümkündür. Məhz bu səbəbdən xaricdən mütəxəssis sifarişi yaranır”, - nazir müavini qeyd edib. 

Açıqlamaya sosial media hesabında münasibət bildirən kənd təsərrüfatı üzrə ekspert V.Məhərrəmli problemə görə nazirliyi günahlandırıb. O, İ.Qədimovanın artıq yeddi ildir bu vəzifədə olmasına diqqət çəkib.

"Deputatlardan biri qalxıb deməyib ki, 7 ildə minlərlə mütəxəssis hazırlamaq olardı, niyə hazırlamamısınız? 7 ildə konkret olaraq nə işlə məşğul olmusunuz?! Kənd təsərrüfatında naşı olsalar da, sözlə manipulyasiya etməyi, vəziyyətdən çıxmağı, gözə kül üfürməyi yaxşı bacarırlar", - o bildirib. 

"Toplum TV"-yə danışan iqtisadçı Toğrul Vəliyev də qeyd edib ki, müəyyən sahələr üzrə ixtisaslı kadr çatışmazlığı olsa da, bunun günahı dövlətin təhsil siyasətində və problemdən əziyyət çəkən qurumlardadır. 

"Nazirlik hər il müxtəlif sahələrdə nə qədər ixtisaslı kadra ehtiyacı olduğunu Təhsil Nazirliyinə və ali təhsil müəssisələrinə təqdim etməli idi. Buna əsasən də dövlət sifariş hazırlamalıdır və ehtiyacları təmin etməlidir. Əgər nazirlik fəaliyyət müddətində bu ehtiyacları müəyyən edə bilməyibsə, bu onların problemidir. Kənd Təsərrüfatı Nazirliyi neçə ildir fəaliyyət göstərir", - o deyib. 

İqtisadçı kadr çatışmazlığının yarandığı sahələrdə əməkhaqlarının aşağı olmasını da səbəblərdən biri kimi görür. 

"Ola bilər ki, dövlət sifariş verir, lakin insanlar həmin sahələrə maraq göstərmir. Bu da təbiidir. İnsanlar istəyir ki, heç olmasa ilkin ehtiyaclarını qarşılayacaq əməkhaqqının verildiyi sahədə çalışsınlar. Kənd təsərrüfatı isə bu baxımdan cəlbedici deyil", - o söyləyib.