“Abzas Media”nın həbsdə olan jurnalistləri Sevinc Vaqifqızı, Nərgiz Absalamova və Elnarə Qasımova aclıq etdiklərinə görə “qeyri-insani münasibətə” məruz qaldıqlarını bildiriblər.
“Abzas Media"nın xəbərinə görə, iyulun 22-də aclığa başlayan jurnalistlər həmin gün Bakı İstintaq Təcridxanasının rəisi Elnur İsmayılovun qəbuluna aparılmaq adı ilə otaqlarından çıxarılıblar.
“Onun müavini Əhəd Abdıyevin otağında saat yarım gözləyəndən sonra dedilər ki, Penitensiar Xidmətdən nümayəndələr gəlmişdilər, sizinlə görüşmək istəyirdilər, amma fikirlərini dəyişib getdilər. Qabağımıza çıxmağa ürək etməyiblər,” - jurnalistlər deyib.
Onların sözlərinə görə, daha sonra öz otaqlarından çıxarılıb ayrı otaqlarda yerləşdiriliblər və hazırda hər biri tək qalır.
“Üçümüzün də otağında duş sistemi yoxdur, pəncərənin şüşələri çıxarılmayıb, normal havalandırma yoxdur. Otaqların hamısı natəmizdir və otaq yoldaşlarımıza da icazə vermədilər ki, otaqları təmizləmədə bizə kömək etsinlər”, - onlar qeyd edib.
Jurnalistlər əlavə edir ki, Nərgiz Absalamova öz otağından çıxmaq istəmədiyi üçün Əhəd Abdıyev tərəfindən zorakılığa məruz qalıb. Abdıyevin onu güclə çıxardığı, jurnalistin qollarında qançır izləri qaldığı bildirilir.
“Abzas”çılar pis rəftarın aclığı dayandırmaları üçün edildiyinə inanırlar.
“Abzas Media”nın həbsdə olan direktoru Ülvi Həsənli iyulun 20-də yenidən aclıq aksiyasına başlayıb. O, saxlanıldığı Umbakı təcridxanasından Bakı İstintaq Təcridxanasına qaytarılmasını tələb edir.
Həsənli əvvəlki aksiyasını tələbinin 1 həftəyə yerinə yetiriləcəyi vədi ilə dayandırıb, lakin onun tələbi yerinə yetirilməyib.
İyulun 22-də “Abzas Media”nın qadın jurnalistləri də aksiyaya qoşulub.
İyunun 20-də Bakı Ağır Cinayətlər Məhkəməsində baş tutan iclasda “Abzas Media işi” üzrə təqsirləndirilən şəxslərə hökm oxunub.
Hakimin qərarı ilə “Abzas Media”nın direktoru Ülvi Həsənli, baş redaktor Sevinc Vaqifqızı, araşdırmaçı jurnalist Hafiz Babalı və “Azadlıq Radiosu"nun jurnalisti, iqtisadçı Fərid Mehralızadə 9 il, jurnalistlər Nərgiz Absalamova və Elnarə Qasımova 8 il, “Abzas Media"nın koordinatoru Məhəmməd Kekalov isə 7 il 6 ay azadlıqdan məhrum edilib.
Onlar ilkin olaraq qaçaqmalçılıq olmaqla bir sıra maddələrlə ittiham olunublar.
Həbs olunan şəxslər ittihamları qəbul etmir, peşə fəaliyyətlərinə görə həbs olunduqlarını deyirlər.