III Respublika Platformasının qurucu heyət üzvü Ruslan İzzətli Kürdəxanı İstintaq Təcridxanasından yazır.

Bir adam bir gün Qırmızı Meydanda bildiriş paylayırmış. Polis şəxsi saxlayır və əlindəki kağızları alır. Kağızlar boşdur, içində heç bir yazı yoxdur. 

Polis təəccüblə bağırır: “Nə yayırsan? Bunlar ki, boşdur. İçində heç bir yazı yoxdur”.
Adam cavab verir: “Niyə yazım ki, onsuz da hər kəs hər şeyi bilir”.

Niyə həbs olunmuşam? məqsədləri nədir? Bu sualların cavabı toplumun aktiv kəsimimə aydındır. Amma bu aydınlıq sizdə ümidsizlik, inamsızlıq yaratmasın.
Bəlkə repressiyanın fonunda məğlub görünürük. Amma əsas odur ki, gəncliyini 4 kvadratlıq bir həbsxana hücrəsinə məhkum edən yeni nəsil siyasətçilər təslim olmur. 

Qandinin çox sevdiyim bir sözü var: “Tək başıma qalsam belə gülümsəməyə davam etməliyəm”.

Hakimiyyət son 30 ildə hər 10 ildən bir repressiya maşınını işə salıb, cəmiyyətin potensial etiraz ruhunun qarşısını alıb. Bu ənənəvi siyasət davam edəcək. O zamana qədər ki, biz çıxış yolunu hansısa Qərb ölkələrinin dəstəyində və ya mühacirətə getməkdə yox, məmləkətimizdə oturub yetər artıq deyə bilməkdə görəcəyik.

Bu yazını oxuyanda düşünə bilərsən ki, mən tək nə edə bilərəm, “bir güllə bahar olarmı” fikri beynindən mütləq keçəcək. Amma unutma, bir gül belə baharın gəlişini müjdələyir.

Bugün əlində ağıllı telefon varsa, sosial şəbəkədə aktivsənsə sənin haqqını müdafiə edən, sənin bu ölkədə azad və xoşbəxt yaşamağın üçün gəncliyini 4 kvadratlıq həbsxana hücrəsinə məhkum edən respublikaçıların səsi ola bilərsən.

Bizi dörd tərəfdən əhatə edən uzun və tikanlı məftilləri sizin dəstəyiniz yıxa bilər. Kiçik bir yazınız, bir xoş sözünüz, bir məktubunuz yazılan tarixdə sizi seyirci obrazından iştirakçı obrazına çevirəcək. Susmaq, seyrçi qalmaq və ya haradansa dəyişiklik rüzgarı gözləmək daha 30 il özünü aldatmaqdır.

Aristotel deyirdi ki, vərdişlərinizi dəyişsəniz, taleyinizi dəyişərsiniz. 
Gəlin birlikdə addım ataq. Hər şey sənin addımından asılıdır!

Sevgi və həqiqət qalib gələcək!