Həbsdə olan elmi araşdırmaçı İqbal Əbilovun kitabı nəşr olunub. 

Bu barədə Əbilovun Hüquqlarını Müdafiə Komitəsi məlumat yayıb. 

Rus dilində nəşr olunan “Talış Nitqindən Fraqmentlər I” kitabına XIX əsrin ikinci yarısında alman-rus şərqşünası Boris Dorn tərəfindən toplanmış və 2012-ci ildə Əbilovun arxivlərdə aşkar etdiyi əlyazmaların daxil edildiyi bildirilir. 

“Bu materiallar talış dilinin şimal dialekti barəsində bu günədək məlum olan ən qədim elmi araşdırmalardan biri olaraq xüsusi əhəmiyyət kəsb edir”, - deyə qeyd olunub. 

Kitab Əbilovun həmtəsisçisi olduğu Talış Milli Akademiyası tərəfindən təsis edilmiş "Bibliotheca Talyshica" seriyasının ilk nəşridir. 

“Bu seriyanın başlıca məqsədi talış dilində yazılmış, lakin indiyədək nəşr olunmamış elmi əsərlərlə yanaşı, orta əsrlərdən günümüzə qədər yaşamış talış alimlərinin elmi irsini akademik ictimaiyyətə təqdim etməkdir. Burada həmçinin dilçilik, arxeologiya, coğrafiya, antropologiya və digər sahələrə dair arxivlərdə qorunub saxlanmış, bu günə qədər ictimaiyyətə məlum olmayan tədqiqatlara da yer veriləcək”, - Komitənin məlumatında deyilir. 

İqbal Əbilova mayın 20-də Lənkəran Ağır Cinayətlər Məhkəməsində 18 il hökm oxunub. 

Belarusda yaşayan İqbal Əbilov 2024-cü il iyulun 22-də Azərbaycana qohumlarının yanına gəldiyi zaman saxlanılıb.

İqbal Əbilov Ermənistan xüsusi xidmət orqanları ilə əməkdaşlıqda, razılaşdırılmış şəkildə Azərbaycanda milli zəmində nifrət yaratmaq cəhdində ittiham olunur.

Ona qarşı Cinayət Məcəlləsinin 274 (dövlətə xəyanət), 281.3 (dövlət əleyhinə yönələn açıq çağırışlar – xarici təşkilatların və onların nümayəndələrinin tapşırığı ilə törədildikdə) və 283.1-ci (milli, irqi, sosial və ya dini nifrət və düşmənçiliyin salınması) maddələrilə ittiham irəli sürülüb. 

Əbilovun Hüquqlarını Müdafiə Komitəsi bildirib ki, o, heç bir siyasi fəaliyyətdə iştirak etməyib və onun yeganə “cinayəti” elmi obyektivlik, vicdanlı araşdırma və mədəni irsi qorumaqdır.