“Ölkədə əmanətlərin 63 faizi prezident ailəsinə məxsus banklardadır”

Cəmiyyətin gözü qarşısında milyonlarla dollar dəyəri olan mülklərə malik saysız-hesabsız insanların olduğu ölkədə rəsmi şəkildə tanınan milyonçuların olmaması paradoksdur. 

Problem ondadır ki, özəl biznesdə çalışanlar da hökumət məmurları kimi şəffaflıqdan maksimum qaçmağa çalışırlar. Biznes kommersiya sirrini bəhanə gətirərək nəinki maliyyə məlumatlarını və istehsalla bağlı göstəricilərini maksimum qapalı saxlamağa çalışır. 
Hətta rəsmi təsisçilərinin adlarını gizli tuturlar. Şübhəsiz ki, bunun əsas səbəbi mümkün olduğu qədər özəl biznesdə siyasi hakmiyyətin izləri haqda cəmiyyəti xəbərsiz saxlamqdır.

Bəzən təsadüfən açıqlanan məlumatlar son 20 ildə əsasən dövlət resursları hesabına varlanmış azsaylı bir qrupun sərvətinin miqyasını qismən anlamağa imkan verir.

Bu günlərdə hətta hökumətyönlü medianın “Moody’s Ratings” beynəlxalq agentliyinə istinadən yaydığı xəbər bu qəbildən olan məlumatlardan hesab edilə bilər.

Agentliyin hesabatına görə, əsas parametrlərinə (ümumi aktivlərin, verilən kreditlərin, cəlb edilən depozitlərin həcminə və s.) görə, ölkənin ilk böyük beş bankı sırasında yer alan “Xalq Bank"ın depozit portfelinin 54 faizi 20 nəfər əmanətçiyə aiddir. 
Hesabatdan o da aydın olur ki, bankın ümumi əmanət portfelinin məbləği 1 milyard 905 milyon manat təşkil  edir və bunun 1 milyard 29 milyon manatı həmin şəxslərə aiddir. Yəni orta hesabla iri əmanətçilərin bir nəfərinə düşən depozit məbləği 51,4 milyon manatdır.    

Rəsmi sənədlərə əsasən, “Xalq Bank" ölkə prezidenti İlham Əliyevin ailəsinə məxsus olan 3 aparıcı bankdan biridir. 

Digər iki bank “Kapitalbank” və “Paşabank”dır. 

2025-ci ilin ilk yarısının sonuna olan rəqəmlərə görə, ölkədə fəaliyyətdə olan 21 bankın ümumi aktivlərinin məbləği 55 milyard manata yaxın olub. Dövlətə məxsus banklara aid aktivləri nəzərə alınmasa, məhz özəl bank seqmenti üzrə 39 milyard manat məcmu aktivlərin 23,8 milayrd manatı və ya 61 faizi adıçəkilən bu üç banka aid olub. Habelə, “Xalqbank”ın aktivlərinin məbləği 3 milyard manatdan bir qədər çox olub.

Eyni zamanda, bank sektoru üzrə ümmi depozit portfelinin həcmi 37,3 miyard manat olub ki, ondan 27,2 milyard manatı özəl banklara aiddir. Öz növbəsində, özəl bank seqmentinin depozit portfelinin 17,1 milayrd manatı və ya 63 faizi məhz bu 3 bankın sərəncamında olub.

Toplum TV