Mayın 6-da “Abzas Media işi” üzrə növbəti məhkəmə prosesi baş tutub. 

Prosesdə ötən iclaslarda olduğu kimi şahidlərin dindirilməsi davam edib. 

Bu dəfə Leyla Ağayeva və İsmayıl Tağıyev şahid kimi ifadə verib. 

Onlar “Abzas Media”dan heç vaxt ödəniş almadıqlarını, təqsirləndirilən şəxslərdən isə yalnız bir neçəsini tanıdıqlarını bildiriblər.

İsmayıl Tağıyev deyib ki, onun adına 200 avroluq qəbz yazıblar: “İmzamı da atıblar, mənim imzama oxşayır amma tam mənim imzam deyil. Mən belə bir imza atmamışam”.

Daha sonra müdafiə tərəfi “Abzas Media”-nın ofisində aparılan axtarış əməliyyatının kitabçasının məhkəməyə gətirilməsi və əməliyyat müvəkkillərinin məhkəmədə dindirilməsi haqqında vəsatət qaldırıblar.

Vəkillərin vəsatətlərindən biri də istintaq sənədlərində “mötəbər mənbədən alınan məlumatdan sonra əməliyyata başlanılıb” hissəsi ilə bağlı olub.

Vəkillər də vəsatət qaldırıblar ki, əməliyyat məlumatını verən şəxslər dindirilsin və bu məlumatı məlumatı haradan aldıqlarını desinlər.

Hakim isə bildirib ki, sənədlərin tədqiqi prosesi hələ başlamayıb və sözügedən vəsatətlərə yalnız bu mərhələdən sonra  baxılacaq.

Çıxış edənlərdən təqsirləndirilən Məhəmməd Kekalov istintaq sənədində “ifadə verib və sağ- salamat evinə gedib” ifadəsinə etiraz edib. “Evimə sağ-salamat getməmişəm, orada da həbs olunmuşam”.

Daha bir çıxış edən “Abzas Media” direktoru Ülvi Həsənli deyib ki, istintaq materiallarında saxlanılarkən onun şəxsi əşyalarını polisə könüllü verdiyi qeyd olunur, əslində isə polis əməkdaşları tərəfindən döyülərək onun əşyaları götürülüb.

“Məni səhər 5-də saxladılar. Döyəndən sonra polis olduqlarını dedilər. Mən də dedim ki, bildim elə polissiniz. Kompüterimi, saatımı və telefonumu döyüb alıblar. Üzümdə də izlər var idi”, - Ülvi Həsənli bildirib. 

Daha sonra ittiham tərəfi Ülvi Həsənliyə “sizin ofisinizdən tapılıb pul, bunu necə izah edirsiz?” deyə soruşub. Ülvi Həsənlinin cavabı belə olub: “Onlar pulu mənə uzatdılar, mən də götürmədim ki, əl izim düşməsin. Dedim ki, ekspertizaya verin bu pulları. Buna məhəl qoymadılar, 5 nəfər əlcəksiz saydılar”. 

Abzasçılar bununla bağlı ekspertiza üçün vəsatət verdiklərini, amma təmin olunmadığını bildiriblər. 

Növbəti məhkəmə prosesi mayın 13-ə təyin olunub. 

“AbzasMedia” işi üzrə medianın təsisçisi və direktoru Ülvi Həsənli, koordinatoru Məhəmməd Kekalov, baş redaktoru Sevinc Vaqifqızı, araşdırmaçı jurnalist Hafiz Babalı, jurnalistlər Nərgiz Absalamova, Elnarə Qasımova, Fərid Mehralızadə mühakimə olunurlar. 

İlkin olaraq onlar qaçaqmalçılıq da daxil olmaqla bir neçə maddə üzrə ittiham edilirlər.

Jurnalistlər korrupsiya araşdırmaları və fəaliyyətlərinə görə cəzalandırıldıqlarını bildirirlər.