Həbsdə olan “Abzas Media” əməkdaşlarının məhkəmə prosesində bu dəfə şahidlər dindirilib. 

Aprelin 22-də Bakı Ağır Cinayətlər Məhkəməsində baş tutan iclasda şahid qismində iqtisadçı ekspert Toğrul Vəliyev, vaxtilə “Abzas Media”nın gənc jurnalistlər üçün təşkil etdiyi təlimlərə qatılmış Selcan Zaurqızı, İnarə Hümbətova, Firuzə Məmmədova və başqaları dindirilib.

Vəliyev yalnız ekspert kimi “Abzas Media”ya iqtisadi mövzularda şərhlər verdiyini bildirib. O, təqsirləndirilən şəxslərin heç də hamısını “AbzasMedia”nın əməkdaşı olaraq tanımadığını deyib. 

Məsələn, Hafiz Babalını “Turan” İnformasiya Agentliyinin iqtisadiyyat şöbəsinin redaktoru, Fərid Mehralızadəni isə iqtisadçı kimi tanıdığını qeyd edib. 

İclasda təqsirləndirilən şəxslərin şahid Ənvər Cəfərovun yenidən məhkəməyə gətirilməsi ilə bağlı verdikləri vəsatət təmin olunub. Hakim ötən iclasda Ənvər Cəfərova “Abzas Media” əməkdaşlarının suallarını cavablandırmağa imkan verməmişdi. 

Daha sonra dövlət ittihamçısının təqsirləndirilən şəxslərin dövlət reyestrindən keçməməsi arqumentinə cavab olaraq Babalının vəkili məhkəməyə onun jurnalist vəsiqəsini təqdim edib. 

Ardınca Babalı digər təqsirləndirilən şəxs, “Abzas Media”nın direktor müavini Məhəmməd Kekalova niyə onun sözügedən media orqanının fəaliyyətində fəal iştirak etməsi haqda istintaqa ifadə verdiyini soruşub. 

Kekalov isə ötən iclasda olduğu kimi bu dəfə də istintaqda verdiyi ifadələri yalanlayıb, onları təzyiq altında verdiyini vurğulayıb. 

Növbəti məhkəmə iclası aprelin 29-a təyin olunub. 

“AbzasMedia” işi üzrə həbslər 2023-cü il noyabrın 20-dən başlayıb. 

Hazırda medianın təsisçisi və direktoru Ülvi Həsənli və koordinatoru Məhəmməd Kekalov, baş redaktoru Sevinc Vaqifqızı, jurnalistlər Nərgiz Absalamova, Elnarə Qasımova, Fərid Mehralızadə və araşdırmaçı jurnalist Hafiz Babalı bu iş üzrə həbsdədir.

İlkin olaraq onlar qaçaqmalçılıqda ittiham ediliblər, daha sonra isə ittiham ağırlaşdırılıb. 

Jurnalistlərə qanunsuz sahibkarlıq, cinayət yolu ilə əldə olunan vəsaitlərin leqallaşdırılması, vergidən yayınma və s. ilə bağlı əlavə ittihamlar verilib. 

Qanunvericiliyə görə, bu maddələrə görə 12 ilə qədər azadlıqdan məhrumetmə cəzası nəzərdə tutulur.