"Heç kim Avropa Şurasını şantaj edə bilməz”

"İlham Əliyevin Avropa Şurası ilə bağlı bəyanatları Azərbaycan nümayəndə heyətinin Assambleyadakı səlahiyyətlərindən məhrum edilməsinin ədalətli olduğunu təsdiqləyir”.

Avropa Şurası Parlament Assambleyasının (AŞPA) prezidenti Teodoros Russopulos “Alpha News”-a müsahibəsində belə deyib.

"İki gün əvvəl Əliyev mükəmməl ingilisсəsi ilə bəyanat verdi. Qeyd etməliyəm ki, eşitdiyimə görə, bu, yerli auditoriyaya ünvanlanıb. Bilmirəm, ingilis dili Azərbaycanda rəsmi dildirmi, inanmıram. Bu, daha çox yerli auditoriya üçün deyil, başqaları, xüsusən də Avropa Şurası üçün nəzərdə tutulmuşdu. O, hörmətdən kənar tərzdə Avropa Şurasını vecinə almadığını, onun bizə ehtiyacından çox bizim ona ehtiyacımızın olduğunu, dünyanın dəyişdiyini deyib. O bildirib ki, Avropa Şurası Dağlıq Qarabağa və ölkəsinin qazandığı müharibəyə görə Azərbaycan nümayəndə heyətinin etimadnaməsinə etiraz etmək qərarına gəlib”.

Russopulos bu çıxışla razılaşmayaraq onu “tamalilə yalan” adlandırıb:

“Biz Azərbaycan hakimiyyətindən əvvəlcə məruzəçilərimizin Laçın dəhlizinə, Dağlıq Qarabağa getməsinə icazə verməsini xahiş etmişik. Sonra biz Azərbaycan hakimiyyətindən müşahidəçilərimizə ölkədə keçirilən seçkiləri izləməyə icazə vermələrini xahiş etdik. Biz məruzəçilərə Əliyevin həbsdə olan siyasi opponentlərinə baş çəkmələrinə icazə verilməsini də xahiş etmişik. Bildiyiniz kimi, Əliyevin siyasi rəqiblərini həbs etmək vərdişi var. Onlar heç vaxt zənglərimizə cavab vermədilər, bizi həmişə rədd etdilər”.

AŞPA prezidenti deyib ki, Azərbaycan tərəfi iki ildir qanunun aliliyinə, insan hüquqlarına hörmət etməkdən imtina edir və Avropa Şurasının tələblərinə hörmət etmir.

Buna görə də “Assambleya haqlı olaraq Azərbaycan nümayəndə heyətinin etimadnaməsini ratifikasiya etməmək” qərarına gəlib.

Teodoros Russopulos İlham Əliyevin Avropa Şurasına əhəmiyyət verməməsini deməsini onun şəxsi fikri adlandırıb:

“Mən bu barədə şərh vermək fikrində deyiləm. Əvvəllər etdiyim kimi bu məsələni səfirlər və baş nazir qarşısında qaldıracağam. Mən Azərbaycanın nümayəndə heyətinin geri qaytarılması üçün çox səy göstərmişəm, qanunun aliliyinin, demokratik prosedurların qorunmasından, insan hüquqlarının qorunmasından danışmışam. Onlar isə buna əməl etmədilər”.

Qurum rəhbərinin sözlərinə görə, nümayəndə heyəti əvvəlcə tədbir görəcəklərini desələr də, etməyiblər.

“Bir məhbusu azad etdilər, sonra digərlərini həbs etdilər. Bundan sonra assambleya üzərinə düşəni etdi və ədalətli olaraq nümayəndə heyətinin səlahiyyətlərini ratifikasiya etmədi. Əliyevin bugünkü açıqlamaları da bunu təsdiqləyir. Biz peşman deyilik və düzgün hərəkət etdiyimizə inanırıq", o qeyd edib.

Russopulos İlham Əliyevin Avropa İnsan Haqları Məhkəməsinin qərarlarının icrasından imtina etmək ultimatumuna da toxunub:

"Heç kim Avropa Şurasını şantaj edə bilməz. Avropa Şurası belə bəyanatlardan qorxmur. Çünki Avropa Şurası öz Assambleyasında qanunun aliliyinə, insan haqlarına və demokratik prosedurlara uyğun qərarlar qəbul edib və qəbul etməkdə davam edir”.

O, yanvar sessiyasından sonra nazirlərə müraciət edərək bəzi ölkələrin İnsan Hüquqları Məhkəməsindən çıxacaqlarını dediyini xatırladıb.

“Üç ay keçməmiş Əliyev mənim bu qorxumu təsdiqlədi. Qorxu sözünü mötərizədə yazın, çünki biz heç nədən qorxmuruq, nə Əliyevdən, nə də özünü diktator kimi aparanlardan. Assambleyanın mövqeyi çox aydındır: biz qərara gəldik ki, üzv dövlətlərimizdən heç biri “mən qaydalara hörmət etmirəm, mən həmin qurumdan, institusional qurumdan və ya digər institusional qurumdan istefa verəcəyəm” deyə bilməz”, o deyib.

Prezident İlham Əliyev aprelin 9-da ADA Universitetində “Yeni dünya nizamına doğru” adlı forumda çıxış edərkən bildirib ki, Azərbaycan Avropa Məhkəməsinin çıxardığı qərarları tanımayacaq. 

O, bunu Azərbaycanın nümayəndə heyətinin ötən il Avropa Şurası Parlamentlər Assambleyasından (AŞPA) kənarlaşdırılması haqda suala cavab verərkən səsləndirib. 

Əliyev deyib ki, əgər nümayəndə heyəti Assambleyanın iclaslarında iştirak etmirsə və Avropa İnsan Hüquqları Məhkəməsinin (AİHM) hakimlərinin seçimində səs verə bilmirsə, məhkəmənin Azərbaycan haqda çıxardığı qərarlar da etibarsız sayılacaq. 

AŞPA sədrinin bu dediklərinə cavab olaraq Azərbaycan Xarici İşlər Nazirliyi qurumun 76 üzvünün, eləcə də Teodoros Rusopulosun adını qara siyahıya salıb.

“Ölkəmizin rəhbərini “diktator” adlandırmaq heç bir çərçivəyə sığmır, siyasi mədəniyyətsizlik və nadanlıqdır. Rusopulos Azərbaycana soxularsa, rədd ediləcəkdir”, XİN bildirib.