“Azərbaycan daxilində fəaliyyət göstərən “müstəqil media orqanı qalmayıb”.

Bunu Toplum TV-yə açıqlamasında “Sərhədsiz Reportyorlar” Şərqi Avropa və Mərkəzi Asiya şöbəsinin rəhbəri Cin Kavelyer deyib. 

Kavelyer bildirib ki, Azərbaycanda müstəqil jurnalistika ilə məşğul olmaq demək olar ki, mümkünsüz olub. O əlavə edib ki, Suriya, Şimali Koreya və Eritreya kimi ölkələrdə olduğu kimi, Azərbaycanda da hakimiyyət media resurslarına tam nəzarət edir. 

“Azərbaycanın media məkanında hökumətyönlü media holdinqləri, məsələn, “Media.az” və “Report.az” kimi platformalara sahib olan Global Media Holding hakimdir və onlar dövlət təbliğatının əsas kanalları kimi xidmət göstərirlər. 2014-cü ildən bəri qəbul olunan qanunvericilik yerli medianın xarici donorlar tərəfindən maliyyələşdirilməsini məhdudlaşdırır və bu da müstəqil jurnalistikanın boğulmasına səbəb olur. Praktikada bu iqtisadi məhdudiyyətlər azad və tənqidi reportajlar üçün birbaşa qadağa rolunu oynayır”, - Kavelyer qeyd edib. 

“Sərhədsiz Reportyorlar”ın mayın 2-də dərc etdiyi Dünyada Media Azadlığı İndeksində Azərbaycan 180 ölkə arasında 167-ci yeri tutub. Ölkə Belarusdan yalnız bir pillə geridə qalmaqla, Şərqi Avropa və Mərkəzi Asiya regionlarında media azadlığı ən pis vəziyyətdə olan üç ölkədən biri olub. 

Təşkilatın yayımladığı hesabatda bildirilir ki, Azərbaycanda müstəqil media orqanlarının üzləşdiyi maliyyə problemləri onları ya bağlanmağa, ya da ölkəni tərk etməyə sövq edib. 

Azərbaycana qonşu ölkələrdən Ermənistan 36-cı, Gürcüstan 114-cü, Türkiyə 159-cu, Rusiya 171-ci, İran isə 176-cı yerdə cəmləşib.

Siyahının ilk pillələrində müvafiq olaraq Norveç, Estoniya və Hollandiya qərarlaşıb. ABŞ iki pillə geriləyərək 57-ci yerə düşüb. Son pilləni isə Eritreya tutub.

Təşkilat bildirib ki, indeksin iqtisadi göstəricisi tarixdə ən aşağı nöqtəyə düşüb və bütövlükdə qlobal media azadlığı sahəsində situasiya “çətin” olaraq xarakterizə edilib.

Kavelyer Toplum TV-yə deyib ki, indeksin tarixində ilk dəfədir ki, dünya ölkələrinin yarısında jurnalistika ilə məşğul olmaq üçün şərait “çətin” və ya “çox çətin” olaraq qiymətləndirilir.

“İqtisadi yöndə reallıq daha qorxuludur, ölkələrin dörddə üçü bu baxımdan pis vəziyyətlə üzləşir. Bunun əsas səbəbləri mülkiyyətin cəmləşməsi, reklamçılar və maliyyə dəstəkçilərinin təzyiqi, habelə məhdud və ya qeyri-şəffaf şəkildə ayrılan dövlət yardımı ilə bağlıdır”, - o qeyd edib. 

Kavelyer media azadlığına əsas təhlükələr olaraq Rusiya propaqandasını və ABŞ Prezidenti Donald Trampın gözlənilməz qərarlarını misal çəkib.

Trampın qərarları ilə dünyada müstəqil media orqanlarına maliyyə ayıran ABŞ Beynəlxalq Yardım Agentliyinin əksər proqramları ləğv olunub. Həmçinin, Azad Avropa/Azadlıq Radiosu və Amerikanın Səsi Radiosuna sahiblik edən Qlobal Media Agentliyi ləğv olunub və bu media orqanlarının maliyyəsi kəsilib.

Kavelyer qeyd edib ki, “Sərhədsiz Reportyorlar” demokratik hökumətlərlə, xüsusən də Azərbaycanla güclü iqtisadi əlaqələri olanlarla fəal şəkildə əlaqə saxlayır ki, onları Azərbaycanda həbs edilmiş jurnalistləri azad etmək üçün Prezident İlham Əliyevə təzyiq göstərsinlər. “Biz, həmçinin bu əsassız həbslərə görə məsuliyyət daşıyanları məsuliyyətə cəlb etmək üçün hüquqi yolları araşdırırıq”, - o əlavə edib.