Dekabrın 22-də Bakı Ağır Cinayətlər Məhkəməsində “Meydan TV işi” üzrə həbs olunmuş şəxslərin məhkəmə prosesi keçirilib.

Hakim Aytən Əliyevanın sədrlik etdiyi prosesdə əvvəlcə təqsirləndirilən şəxslərin anket məlumatları dəqiqləşdirilib.

Məhkəmədə iddiaçı qismində Vergilər Nazirliyi təmsil olunub. 

Müdafiə tərəfindən vəkil Zibeydə Sadıqova vəsatət verərək bildirib ki, məhkəmə ictimai maraq kəsb etdiyinə görə audio və video çəkiliş aparmağa icazə verilsin. 

Məhkəmə vəsatəti təmin etməyib, lakin hakim deyib ki, məhkəmə prosesi açıqdır və istənilən media nümayəndəsi iştirak edib, qeyd götürə bilər. 

Daha sonra təqsirləndirilən şəxslərdən "Meydan TV"-nin baş redaktoru Aynur Elgünəş (Qənbərova) ötən prosesdə əlillik və məcburi köçkünlük kartının ibtidai istintaq tərəfindən müsadirə olunub qaytarılmaması ilə bağlı verdiyi vəsatətə baxılıb. Məhkəmə vəsatəti təmin edib. 

A.Elgünəşin təcridxanada iti ilə görüşməsinə icazə verilməsi üçün verdiyi  vəsatətlə bağlı isə hakim müvafiq icra orqanına sorğu göndərilməsinə qərar verib. 

“Meydan TV işi”nə görə həbs olunan "Arqument. az" saytının baş redaktoru Şəmşad Ağa isə vəsatət verərək deyib ki, istintaq hərəkətləri nömrələnmiş blanklarla aparılmalıdır və tələb edib ki, həmin nömrələnmiş sənədlər onlara təqdim olunsun. Məhkəmə vəsatəti təmin etməyib.

Ş.Ağa qərara etiraz olaraq deyib ki, heç bir hüquqi qüvvəsi olmayan sənədlərlə məhkəmə keçirilir. “Belə olan halda bu, məhkəmə deyil, məzhəkədir”, - o bildirib.

Vəkil Rövşanə Rəhimli isə sübutların qiymətləndirilməsi haqqında qərarın təqdim olunması ilə bağlı vəsatət verib. Hakim ona vəkil otağında bu sənədlə tanış ola biləcəyini deyib.

Daha sonra təqsirləndirilən şəxslərdən jurnalistlər Ülviyyə Əli (Quliyeva) və Fatimə Mövlamlı çıxış edərək istintaq tərəfindən cihazlarının götürüldüyünü bildirib və qaytarılmasını tələb edib. Məhkəmə vəsatəti təmin etməyib. 

Sonda dövlət ittihamçısı ittiham aktını oxunmağa başlayıb. İttiham aktı oxunarkən "Meydan TV"-nin qadın jurnalistləri mahnı oxumağa başlayıblar. Onlar Üzeyir Hacıbəylinin “Arşın mal alan” operettasından “Qızların xoru”nun sözlərini dəyişərək ittiham aktına bu formada etirazlarını bildiriblər: 

“Qaçaqmalçı, mal göstər,

Mülklərini aç göstər.

Göstər, göstər hər nə var,

Xalqın öyrənmək istər.

Ah, nə gözəl ölkədir,

Hamısı bir əldədir,

Hər tərəfi türmədir, türmə, türmə.

Ondan bir azadlıq qoparsaydım,

Oynardım mən doyunca-doyunca”.

Növbəti proses yanvarın 16-na təyin edilib.

"Meydan TV işi" üzrə 12 nəfər ittiham olunur.

2024-cü il dekabrın 6-da “Meydan TV işi” üzrə saytın Azərbaycan nümayəndəliyinin rəhbəri Aynur Elgünəş, jurnalistlər Ramin Deko (Cəbrayılzadə), Aysel Umudova, Aytac Tapdıq, Xəyalə Ağayeva, Natiq Cavadlı və vətəndaş cəmiyyəti üzvü Ülvi Tahirov saxlanılıblar.

Sonradan “Arqument. az” saytının baş redaktoru, "Meydan TV" ilə əməkdaşlıq edən jurnalist Şəmşad Ağa, jurnalistlər Nurlan Libre (Qəhrəmanlı), Fatimə Mövlamlı, Ülviyyə Əli (Quliyeva) və fotoqraf Əhməd Muxtar da “Meydan TV işi”nə görə həbs edilib.

Onlar, əsasən, qaçaqmalçılıq olmaqla bir neçə maddə ilə ittiham olunurlar. 

Saxlanılan jurnalistlərin heç biri özünü təqsirli bilmir. Onlar jurnalist fəaliyyətinə görə hökumətin siyasi sifarişi ilə həbs olunduqlarını deyirlər.