“QHT işi” üzrə ittiham olunan, ABŞ-nin “German Marşal Fondu”nun Azərbaycan üzrə məsləhətçisi olmuş Mehriban Rəhimlinin işi üzrə növbəti məhkəmə prosesi keçirilib. 

Fevralın 25-də Bakı Ağır Cinayətlər Məhkəməsində hakim Namiq Kərimovun sədrliyi ilə keçirilən prosesdə dövlət ittihamçısı ittiham aktını oxuyub. 

M.Rəhimli sosial media hesabında yazıb ki, bir saat ərzində dövlət ittihamçısı 2008-ci ildən onun Azərbaycan Beynəlxalq Bankına köçürmə ilə aldığı və bütün vergi və digər öhdəliklərini yerinə yetirdiyi maaşları sıra ilə oxuyub. 

"Boğazı qurudu, təntidi, bezdi. Vəkilim hamının bezdiyini görüb, mənə "ittiham aktının oxunmuş kimi" qəbul etmək hüququmuz olduğunu söylədi. Dedim, xeyr, qoy oxusun, qoy gələnlər - jurnalistlər və diplomatlar bu divarlar içində dövlət adına nə rəzillik baş verdiyini görsünlər", - o qeyd edib.

İttiham aktını bitirməyə vaxt yetməyib. Növbəti məhkəmə prosesi martın 18-i saat 09.30-a təyin olunub. 

Mehriban Rəhimli Baş Prokurorluqda “QHT işi” ilə bağlı başladılan cinayət işi çərçivəsində ötən ilin mart ayında istintaqa cəlb olunub. Onun barəsində istintaq müddətində polis nəzarətinə verilmə qətimkan tədbiri seçilib.

"QHT işi” üzrə həbslər 2025-ci ilin martında başlayıb. Vətəndaş Hüquqları İnstitutunun rəhbəri Bəşir Süleymanlı, Seçki Müşahidə Alyansının icraçı direktoru Məmməd Alpay və "Hüquq və İnkişaf" İctimai Birliyinin rəhbəri Hafiz Həsənov saxlanılıb. H.Həsənov sonradan ev dustaqlığına buraxılıb. 

Onlara qarşı Cinayət Məcəlləsinin vəzifə saxtakarlığı və qanunsuz pul vəsaitlərini leqallaşdırma daxil olmaqla bir neçə maddəsi üzrə ittiham irəli sürülüb. 

Apreldə isə ictimai fəal Asəf Əhmədov, sosial işçi Zamin Zəki və Əhməd Məmmədzadə də eyni ittihamla həbs edilib. 

İqtisadçı Qalib Bayramov və hüquq müdafiəçisi Nərgiz Muxtarova barəsində polisin nəzarəti altına vermə tədbiri seçilib. Ölkə xaricində olan Sübhan Həsənli və Aytac Ağazadə isə axtarışa verilib.

İstintaqa 100-dən çox şəxs, o cümlədən beynəlxalq donor təşkilatlarının əməkdaşları və bəzi hökumətyönlü QHT rəhbərləri cəlb olunub.