"Abzas Media"nın həbsdə olan jurnalistləri Sevinc Vaqifqızı, Elnarə Qasımova və Nərgiz Absalamovanın valideynləri övladlarının saxlanıldığı Lənkəran Penitensiar Kompleksinin rəisi Babək İsgəndərovun cəzalandırılmasını tələb edir. 

Onlar buna səbəb kimi həbsxana rəisinin iş otağında qadın məhbuslardan birini döyməsi xəbərini əsas gətirib. 

"Abzas Media"nın yaydığı müraciətdə valideynlər bu xəbərin fonunda öz övladlarının təhlükəsizliyi ilə bağlı arxayın ola bilmədiklərini deyiblər. 

"Həbsxananın rəisi Babək İsgəndərov qadın məhbusları aparıb öz ikiqapılı otağında döyür. Özü şəxsən zorakılıq törədirsə, onda biz onun əməkdaşlarından hansı davranışı gözləməliyik? O, sabah bizim qızlara qarşı da belə davrana bilər. Fərqi yoxdur orada kim döyülür, onlar da Azərbaycan vətəndaşlarıdır. Ona görə də biz Babək İsgəndərovun cəzalandırılmağını tələb edirik. Övladlarımız Bakıda qeydiyyatda olsa da, onları Lənkəran həbsxanasına göndərdilər. Deməli, hökumət bilərək bunu edib ki, onlar zorakı rəisin tabeliyində olsunlar?”, - onlar qeyd edib. 

Rəisin qadın məhbuslardan birini döyməsi xəbərini də "Abzas"çılar ictimailəşdirib. Onların sözlərinə görə, yanvarın 24-də baş verən hadisəni nəzarətçilərdən biri məhbuslara danışıb. 

Nəzarətçinin sözlərinə görə, rəis qadın məhkumun saçından tutaraq onu yerdə sürüyüb, qabırğa nahiyəsindən təpiklə vurub. Eyni zamanda, döyülmə zamanı məhkumun şərəf və ləyaqətini alçaldan ifadələr işlədib.

Məlumata görə, ertəsi gün döyüldüyü deyilən qadın məhkumun sol ayağında qançır izləri, qabırğa nahiyəsində isə şiş yaranıb. Həmçinin, ağrıların şiddətindən korpusun həyətində huşunu itirərək yerə yıxıldığı qeyd olunub. 

2025-ci ilin iyunun 20-də Bakı Ağır Cinayətlər Məhkəməsində baş tutan iclasda “Abzas Media işi” üzrə təqsirləndirilən şəxslərə hökm oxunub. 

Hakimin qərarı ilə “Abzas Media”nın direktoru Ülvi Həsənli, baş redaktor Sevinc Vaqifqızı, araşdırmaçı jurnalist Hafiz Babalı, "Azadlıq Radiosu"nun jurnalisti Fərid Mehralızadə 9 il, jurnalistlər Nərgiz Absalamova və Elnarə Qasımova 8 il, “Abzas Media”nın koordinatoru Məhəmməd Kekalov isə 7 il 6 ay azadlıqdan məhrum edilib.

Onlar qaçaqmalçılıq da daxil olmaqla bir neçə maddədə ittiham ediliblər.

Lakin jurnalistlər ittihamları rədd edib və məhz peşə fəaliyyətlərinə görə həbs olunduqlarını bildiriblər.