"Onillər boyunca Ermənistan və Azərbaycan arasında Dağlıq Qarabağ uğrunda münaqişə insanlar üçün iztirab mənbəyi olub".

"Turan"ın məlumatına görə, bu fikirlər “Amnesty International»-ın bu gün, mayın 17-də dərc edilmiş məruzələrindən birində yer alıb.

"Ən son qaçış: Dağlıq Qarabağda münaqişə zamanı yaşlı insanların məcburi köçürülməsi və onlara qarşı hərbi cinayətlər" sərlövhəli birinci məruzədə ermənilərin hüquqlarının pozulmasından bəhs edilir.

"Azərbaycanda yaşlı insanlar üçün məcburi köçkünlük və qayıdışa hazırlıq necə keçir" adlı digər məruzədə isə yaşlı azərbaycanlıların çəkdiyi əziyyətlərdən bəhs edilir.

"Dağlıq Qarabağ münaqişəsi silahlı münaqişə zamanı yaşlı insanların hansı xüsusi risklərlə qarşılaşdıqlarını göstərir. Çox vaxt onlar ən sonda qaçırlar, sonra isə onillər boyunca müharibənin nəticələrini yaşayırlar", - deyə məruzədə qeyd edilib.

Hüquq-müdafiə təşkilatı vurğulayır ki, münaqişənin davam edə biləcəyi yüksək gərginlik şəraitində Ermənistan və Azərbaycan hakimiyyəti yaşlı insanların müdafiəsini prioritet vəzifəyə çevirməli və onların hüquqlarını, mənzil və sağlamlıq hüquqlarını qorumaq üçün maksimum səy göstərməlidir.

"Bütün köçkünlər ilkin yaşayış yerlərinə təhlükəsiz və ləyaqətli şəkildə qayıtmaq hüququna malikdirlər. Yaşlı insanların üzləşdiyi xüsusi risklər nəzərə alınmalıdır. Azərbaycan hakimiyyəti onların lazımi mənzil və digər insanlarla eyni şəkildə qazanc əldə etmək imkanı ilə təmin edilməsi üçün ondan asılı olan hər şeyi etməlidir", - deyə, təşkilat əlavə edir.

"Amnesty International" hesab edir ki, Ermənistan qüvvələrinin mülki obyektləri məhv etməsi və vətəndaşların əmlakını müsadirə etməsi, habelə yerüstü minalardan geniş istifadəsi beynəlxalq humanitar hüquq normalarının pozuntusudur: "Bu pozuntular nəinki köçkünlərin qayıtmaq hüququnu həyata keçirməsinə mane olur, həm də Azərbaycanın məcburi köçkünlərin münaqişənin əhatə etdiyi rayonlara köçürülməsi üzrə səylərinə ciddi maneə törədir".