“Onlar aksiya keçirmək niyyətləri barədə Bakı şəhər İcra Hakimiyyətinə müraciət ediblər. Müraciətə baxılıb və aksiyanın keçirilməsinin məqsədəuyğun olmaması barədə təşkilatçılara rəsmi cavab verilib".

Bu sözləri Daxili İşlər Nazirliyi (DİN) sentyabrın 30-da Milli Məclisin binası qarşısında aksiyanın keçiriləcəyi ilə bağlı məlumatlara münasibət bildirərkən deyib.  

DİN Mətbuat Xidmətinin bölmə rəisi Zeyni Hüseynov APA-ya bildirib ki, Bakı şəhər İcra Hakimiyyəti ilə razılaşdırılmamış hər hansı aksiyanın və ya yürüşün keçirilməsinə cəhd edilərsə, bu qanunsuz hesab olunacaq və qarşısının alınması üçün zəruri olan bütün tədbirlər görüləcək.

https://toplum.tv/siyaset/milli-meclisde-qanun-layihesi-siyasi-partiyalarin-fealiyyeti-bu-hallarda-dayandirilacaq

"İctimai asayişin pozulmasına yönəlmiş bu cür cəhdlərin qarşısı alınarkən polislərlə qanunsuz aksiyanın iştirakçıları arasında baş verə biləcək bütün hadislərin məsuliyyəti həmin razılaşdırılmamış aksiyanın təşkilatçılarının üzərinə düşəcək", - DİN rəsmisi bildirib. 

AXCP fəalları sentyabrın 30-u saat 16-da Milli Məclisin binası qarşısında aksiyanın keçirilməsi barədə məlumat yayıblar. Fəalları “Siyasi partiyalar haqqında” qanun layihəsinə etiraz etmək istədiklərini bildiriblər. 

“Siyasi partiyalar haqqında” yeni qanun layihəsi sentyabrın 7-də Milli Məclisdə təqdim edilib. Layihənin parlamentin payız sessiyasında müzakirəyə çıxarılması gözlənilir. Payız sessiyası sentyabrın 30-da başlanacaq.

Yeni qanun layihəsi siyasi partiyanın Azərbaycanda son 20 il daimi yaşayan azı 200 vətəndaş tərəfindən təsis edilməsi, partiyanın dövlət qeydiyyatına alınması üçün azı 10000 üzvünün olması kimi tələblər irəli sürür. 10000 üzv şərtini hazırda dövlət qeydiyyatında olan partiyalara da şamil etmək nəzərdə tutulur (60 partiya qeydiyyatdadır). 

Layihəyə əsasən, partiya parlament, prezident və ya bələdiyyə seçkilərində ardıcıl olaraq iki dəfə iştirak (qeydə alınmış namizədin seçkilərdə bilavasitə iştirakı formasında) etmədikdə Ədliyyə Nazirliyi apellyasiya məhkəməsində iddia qaldırıb qurumun ləğvini istəyə bilər.