Azərbaycan Xalq Cəbhəsi Partiyasının (AXCP) həbsdə olan sədri Əli Kərimliyə qarşı psixoloji təzyiqlərin olduğu deyilir. 

Ə.Kərimlinin Hüquqlarını Müdafiə Komitəsinin yaydığı məlumata görə, partiya sədrinin saxlanıldığı kameraya məqsədyönlü şəkildə psixoloji problemləri olan şəxs salınıb. 

"Bu şəxsin psixi sağlamlıq durumu başqaları üçün işgəncə şəraiti yaradır. Bu şəxsin gecə saatlarında uca səslə anlaşılmaz “zikr etmə vərdişi” onunla eyni kamerada yaşamağa məcbur edilənləri yuxu imkanlarından məhrum edir. Biz həmin şəxsin kimliyini də bilirik, onun bioqrafik göstəriciləri də bizə bəllidir, dəqiq bilirik ki, bu cür şəxslər mütləq təkadamlıq kameralarda yerləşdirilməli və müalicə alıb psixi sağlamlıq durumu tam normallaşana qədər mütəxəssis həkim nəzarəti altında olmalıdırlar. Biz əminik ki, bu situasiya qəsdən yaradılıb və məqsəd, əlbəttə, fiziki heysizləşdirmə yolu ilə Əli Kərimlinin iradəsini qırmaqdır", - bəyanatda qeyd olunub. 

Bəyanatda həmçinin bildirilib ki, Ə.Kərimli bu yaxınlara qədər saxlanıldığı kameradan çıxarılıb və hazırkı kameraya yerləşdirilib. Bu kamerada isə televizorun olmadığı, burada saxlanılan digər şəxslərin də telefonla zəng hüquqlarının məhdudlaşdırıldığı deyilir.

Ə.Kərimli daha öncə məhkəmədə demişdi ki, xarici mediaya müsahibəsindən sonra onun ailə üzvləri ilə telefon danışığı imkanları əlindən alınıb. 

Komitə əlavə edir ki, Azərbaycan hakimiyyətinin Ə.Kərimliyə qarşı "başqa, daha ciddi və daha məkrli planları ola bilər və indi yaradılan bu situasiya da həmin planın tərkib hissəsidir". 

Əli Kərimli ötən il dekabrın 1-də həbs olunub. Ona qarşı Cinayət Məcəlləsinin 278.1-ci (hakimiyyəti zorla ələ keçirməyə, dövlətin konstitusiya quruluşunu zorla dəyişdirməyə yönələn hərəkətlər) maddəsi ilə ittiham irəli sürülüb.

Onunla yanaşı AXCP Ali Məclisinin katibi Məmməd İbrahim də eyni ittihamla həbs olunub. Onlar ittihamları rədd edir, hakimiyyətin sifarişi ilə həbs olunduqlarını bildirirlər.