“Meydan TV”nin həbsdə olan baş redaktoru Aynur Elgünəş (Qəmbərova) media qurumunun 12 yaşı münasibətilə ictimaiyyətə məktub ünvanlayıb. 

Elgünəş məktubunda bildirir ki, “Meydan TV işi” üzrə həbs olunan dörd nəfərin - Ülvi Tahirov, Fatimə Mövlamlı, Nurlan Libre (Qəhrəmanlı) və Ülviyyə Əlinin (Quıiyeva) bu media qurumuna aiddiyatı yoxdur.

“Mən bu media orqanının baş redaktoru kimi bir daha bəyan edirəm, adlarını çəkdiyim şəxslərin heç biri Meydan TV-nin işçisi olmayıb və deyil” - o yazıb. 

Elgünəş qeyd edib ki, Mövlamlının evində axtarış zamanı tapıldığı iddia olunan pul vəsaitinin də “Meydan TV” ilə əlaqəsi yoxdur. 

“Tək bir faktı deyim! Avro ilə maraqlanan hər kəs bilir ki, 500-lük əskinaslar dövriyyədən çıxarılıb, xüsusilə Avropa bankları bu əskinasları vermir. Azərbaycanda isə hələ proses yeni başlayandan 500-lüklər valyutadəyişmə məntəqələri tərəfindən qəbul edilmirdi. Belə olan halda Fatimə Mövlamlının evindən “tapılan” 500-lük necə Meydan TV-yə məxsus ola bilər?”, - deyə o sual edib. 

Baş redaktor bir daha bildirib ki, onlara qarşı irəli sürülən qaçaqmalçılıq ittihamı saxtadır və peşə fəaliyyətlərinə görədir. 

“Bu, bizi susdurmaq üçün nəzərdə tutulan vasitədir və işə yaramayacaq. Bizim yeganə “cinayətimiz” əqidəmizdir. Hakimiyyətin mirzəsi, tezislə işləyəni olmadığımız üçün hədəfdəyik. Bu adamları tutmaqla əlində kamera olan heç bir jurnalisti görmək istəmədiklərini göstərirlər. Əslində elə əlaqəsiz adamların bir cinayət işi çərçivəsində həbsi bunu göstərir”, - Elgünəş vurğulayıb. 

Jurnalist həm də qeyd edib ki, ölkədə əsl qaçaqmalçılıqla məşğul olanlar hakimiyyət nümayəndələridir:

“Qaçaqmalçılar Azərbaycanın sərvətlərini bəyənmədikləri Avropaya, Amerikaya daşıyanlardır. Adi MSK sədrinin (əslində missiyası adi deyil, ən böyük pisliyə, seçki saxtakarlığına imza atır) varidatının çox cüzi hissəsi bu günlərdə ictimailəşdi. İndi görün ölkənin əsas fiqurlarının, büdcəni idarə edənlərin nələri var.” 

Elgünəş sonda bildirib ki, “Meydan TV” heç bir siyasi qrupa bağlı deyil və “istənilən şəxsin hakimiyyəti dövründə məqsədi, yolu dəyişməyəcək”.

2024-cü il dekabrın 6-da “Meydan TV işi” üzrə saytın Azərbaycan nümayəndəliyinin rəhbəri Aynur Elgünəş, jurnalistlər Ramin Deko, Aynur Elgünəş, Aysel Umudova, Aytac Tapdıq, Xəyalə Ağayeva, Natiq Cavadlı saxlanılıblar.

Sonradan “Arqument.az” saytının baş redaktoru, Meydan TV ilə əməkdaşlıq edən jurnalist Şəmşad Ağayev (Ağa), jurnalistlər Nurlan Libre (Qəhrəmanlı) və Fatimə Mövlamlı da “Meydan TV işi”nə görə həbs edilib.

Müstəqil jurnalist Ülviyyə Əli də mayın 7-də bu iş üzrə saxlanılıb və barəsində qaçaqmalçılıq maddəsi ilə ittiham irəli sürülüb.

O, həbsindən öncə yazdığı bəyanatda MeydanTV ilə heç bir işgüzar əlaqəsi olmadığını, olsaydı belə, bunu cinayət hesab etmədiyini yazıb.

Saxlanılan jurnalistlərin heç biri özünü təqsirli bilmir.