Beynəlxalq Cinayət Məhkəməsinin (BCM) prokurorluğu Belarus hakimiyyətinin, o cümlədən ölkə prezidenti Aleksandr Lukaşenkonun insanlığa qarşı ehtimal olunan cinayətlər törətməsi ilə bağlı araşdırmaya başlayıb. Bu barədə “Reuters” agentliyi məlumat yayıb.

Agentliyin yazdığına görə, Belarus BCM-nin üzvü deyil, lakin iddia Roma Statutunu ratifikasiya etmiş Litva tərəfindən qaldırılıb. Şikayətdə Belarus hakimiyyətinin siyasi rəqiblərin deportasiyasına səbəb olduğu iddia edilən cinayətlərdən bəhs olunur.

BCM prokurorluğu müəyyən edib ki, ehtimal olunan cinayətlərin azı bir hissəsi Litva ərazisində törədilib. Bu isə beynəlxalq məhkəməyə həmin işi araşdırmaq üçün yurisdiksiya verir.
Məhkəmənin məlumatına görə, Minsk hakimiyyətinin hərəkətləri Lukaşenkonun “real və ya ehtimal olunan rəqiblərinə” qarşı yönəlib. Qərarda qeyd olunur ki, bu cinayətlərin genişmiqyaslı və sistemli şəkildə mülki əhaliyə qarşı təqiblər çərçivəsində törədildiyini düşünmək üçün əsaslar var. Bu nəticə hadisələrin miqyası, qurbanların sayı və hərəkətlərin təşkilatlanmış xarakteri ilə əsaslandırılır.

Belarus müxalifətinin liderlərindən biri Svetlana Tixanovskaya BCM-nin qərarını alqışladığını bildirib. Onun sözlərinə görə, “yüz minlərlə belaruslu rejimin hərəkətləri nəticəsində zərər çəkib və çəkməyə davam edir. Lukaşenkonun siyasəti həmçinin Belarusun qonşu ölkələri üçün də təhlükələr yaradır”.

2020-ci ilin avqustunda Belarusda prezident seçkilərinin nəticələrinə etiraz olaraq kütləvi küçə aksiyaları başladı. Seçkilərin qalibi kimi Aleksandr Lukaşenkonun ardıcıl altıncı dəfə prezident elan olunması geniş narazılığa səbəb oldu. Etirazçılar onun istefasını və yeni seçkilərin keçirilməsini tələb edir, hakimiyyəti misli görünməmiş seçki saxtakarlığında və müxalifət aksiyalarının iştirakçılarına qarşı sərt davranmaqda ittiham edirdilər.

Hüquq müdafiəçilərinin məlumatına görə, etirazların dağıdılması zamanı azı səkkiz nəfər həlak olub. Hakimiyyət rəqiblərinə qarşı minlərlə cinayət işi açıb, yüzlərlə insan, o cümlədən müxalifət liderləri uzunmüddətli həbs cəzalarına məhkum edilib. Bir sıra fəallar isə ölkəni tərk etməyə məcbur qalıb. Kütləvi repressiyalardan sonra küçə etirazları faktiki olaraq səngiyib.