Tarixçi və Demokratik Qüvvələrin Milli Şurasının sədri Cəmil Həsənli hökumətyönlü mediada Çin universitetlərinin təbliğatının aparılmasını tənqid edib. 

Həsənli “Facebook” hesabında yazıb ki, Prezident İlham Əliyevin bu yaxınlarda Çinə etdiyi səfər fonunda aparılan bu təbliğat “tamamilə yanlış və zərərlidir”. 

Tarixçi vurğulayıb ki, çinlilər öz uşaqlarını yüksək səviyyəli təhsil almaq üçün Qərb, xüsusən də, ABŞ universitetlərinə göndərir.

“Deməli onlar öz uşaqlarını daha yaxşı təhsil almaq üçün Harvard, Prinston, Kolumbiya, Stenford, Berkeley, Yeyl, Oksford, Kembric, LSE, Sarbon, Humbolt universitetlərinə göndərəcək, biz də öz gənclərimizi Çin universitetlərinə. İş gəlib o yerə çatıb ki, Azərbaycanda “Erasmus” təhsil proqramını qapadıb, Çin universitetlərini təbliğ edirlər. Faciədir. Anlamazlıqdır. Nadanlıqdır”, - o qeyd edib. 

İlham Əliyev Çin televiziyasına müsahibəsində daha çox azərbaycanlının Çinə səfər etməsini, təhsil almaq, işləmək üçün gəlməsini istədiyini deyib. O əlavə edib ki, Çin Prezidenti Si Cinpinlə təhsil sahəsində əməkdaşlığı da müzakirə edib. 

“Düşünürəm ki, Azərbaycandan daha çox sayda tələbənin buraya gəlməsi üçün böyük imkan var. Həmçinin, zənnimcə, Azərbaycanda Çin-Azərbaycan Universitetinin yaradılması barədə düşünmək yaxşı fikir olar. Hazırda biz bu imkanın dəyərləndirilməsi mərhələsindəyik”, - Əliyev deyib. 

Müsahibənin yayımlanmasından sonra Azərbaycanda dövlət və hökumətyönlü mediada müxtəlif təhsil ekspertlərinə istinadlarla Çinlə təhsil əməkdaşlığı haqda yazılar dərc olunub. 

Azərtac təhsil eksperti Ramin Nurəliyevə istinadla yazıb ki, yeni qurulacaq Azərbaycan-Çin Universiteti “təhsildə keyfiyyətin artırılması, elmi araşdırmaların genişlənməsi və tələbələr üçün yeni imkanların yaradılması baxımından önəmli addım olacaq”. 

“Bu, həm də Şərq ölkələrinin qabaqcıl təhsil təcrübəsinin ölkəmizdə tətbiqinə təkan verəcək”, - o deyib. 

Bir sıra yüksək reytinqli Qərb universitetlərində, həmçinin Çin universitetlərində mühazirələr dediyini qeyd edən Cəmil Həsənli hər iki təhsil sisteminə bələd olduğunu vurğulayıb. 

“Uzun müddət Şimali Koreya gəncləri də məhz Çində təhsil almışdı. Deyəsən, biz də o yolu getmək istəyirik”, - o yazıb.