Yerevanda Fransa və Ermənistan arasında 2025-ci il üçün əməkdaşlıq proqramı imzalanıb (https://t.me/jamnewsru/21027).  

Ermənistan Müdafiə Nazirliyinin məlumatına görə, proqram müdafiə sahəsində əməkdaşlığa aiddir və silahlı qüvvələrin bu sahədəki bütün fəaliyyət istiqamətlərini  əhatə edir.

Aşıqlamada bildirilir ki, Ermənistan-Fransa strateji məsləhətləşmələrində müdafiənin planlaşdırılmasına, hərbi təhsil və təlimlərə, məsləhət dəstəyinə, müxtəlif qoşun növlərinin hazırlığına və hərbi-texniki əlaqələrə xüsusi diqqət yetirilib. 

2024-cü ilin iyununda Yerevan və Parisin mövcud hərbi-texniki əməkdaşlığı dərinləşdirdikləri bildirilmişdi. Fransanın silahlı qüvvələr naziri Sebastyan Lekornyu (Sebastien Lecornu) demişdi ki, söhbət “Sezar” (“Caesar”) haubitsalarının tədarükündən gedir.

Ermənistan və Fransa 2023-cü ilin oktyabr ayında hərbi əməkdaşlıq sazişi imzalayıblar.

Tərəflər Ermənistana “mülki əhalini qoruyacaq və sərhədlərin mühafizəsini təmin edəcək silahlar” verilməsinə razılaşıblar. Fransa bu ölkəyə “GM 200” radiolokasiya stansiyaları və qısa mənzilli  “Mistral” raketləri tədarük etməyi öhdəsinə götürüb.

Azərbaycan prezidentinin köməkçisi Hikmət Hacıyevsə  jurnalistlərə açıqlamasında deyib ki, Ermənistana verilən hücum silahları ciddi narahatlıq doğurur. O, bu prosesdə Fransanın rolunu xüsusi olaraq qeyd edib.

"Təəssüf ki, Fransa beynəlxalq öhdəliklərinə və NATO və Avropa İttifaqının üzvü statusuna zidd olaraq, silahlanma proqramında iştirak edir", deyə o bildirib. 

İkinci Dünya Müharibəsindən sonrakı təcrübəni xatırladan Prezidentin köməkçisi hesab edir ki, təcavüzkar ölkəyə qarşı "müəyyən məhdudiyyətlər" tətbiq edilməli, Ermənistanın silahlanması "məsuliyyət parametrləri" çərçivəsində həyata keçirilməlidir.

Hikmət Hacıyev Ermənistan-Azərbaycan sərhədində Avropa İttifaqının müşahidəçi missiyasının fəaliyyətinin dayandırılması haqda rəsmi Bakının tələbini təkrar edib. 

"Aİ missiyası regionda sülhün bərqərar olmasına töhfə vermir. Bu, Ermənistan və Azərbaycandan asılıdır. Üçüncü tərəfin iştirakı yalnız gərginliyi artırır. Bundan başqa, ayrı-ayrı Avropa dövlətləri Aİ missiyası adı altında Ermənistanda öz maraqlarına xidmət edir", deyə Hikmət Hacıyev bildirib.