Dekabrın 12-də Bakı Ağır Cinayətlər Məhkəməsində ictimai fəal İlhamiz Quliyevə hökm oxunub. O, 3 il müddətinə azadlıqdan məhrum edilib. 

Hökmdən əvvəl vəkilləri Zibeydə Sadıqova və Rövşanə Rəhimli müdafiə çıxışı edib. Onlar İlhamiz Quliyevin ötən ilin sentyabrında Abzas Mediaya verdiyi müsahibəyə görə qisas məqsədilə həbs olunduğunu, işgəncəyə məruz qaldığını və şərləndiyini bildiriblər. Qeyd ediblər ki, müdafiə tərəfi bunu sübuta yetirmək üçün çoxsaylı vəsatətlər versə də, məhkəmə təmin etməyib. Bundan başqa, istintaq və məhkəmə dövründə İlhamiz Quliyevin hüquqları kobud şəkildə pozulub. 

“İlhamiz Quliyev başına gələnlərlə bağlı Fuad Ələsgərovun qəbuluna yazılmaq üçün evdən çıxanda bir həftə ərzində onu izləmiş polislər tərəfindən hücuma məruz qalıb, döyülüb, 28-ci polis bölməsində işgəncələr davam edib, bu yolla da narkotik onun üzərində sənədləşdirilib. Ancaq məhkəmə bizə imkan yaratmadı ki, bunları sənədlərlə ortaya qoyaq”, vəkil Zibeydə Sadıqova söyləyib. 

Vəkillər İlhamiz Quliyev barəsində bəraət hökmü çıxarılmasını istəyiblər. 

Vəkillərin çıxışından sonra İlhamiz Quliyev son söz deyib. O, başına  gələnlərin kökündə qisasçılıq dayandığını bir daha vurğulayıb: 

“Vəkillərimin də qeyd etdiyi kimi, bu, qisasdır. Həm də şərəfsizcə bir qisasdır. Bu proseslər ötən ilin 5 oktyabrından başlayıb. Həmin gün səhər ölkədən çıxışım məhdudlaşdırıldı, axşamsa saxlanıldım, barəmdə 30 sutkalıq inzibati həbs qərarı çıxarıldı.  Noyabrda həbsdən buraxılandan sonra başladım məni gözləyə biləcək təhlükələrdən müdafiə üçün qabaqlayıcı tədbirlər görməyə. Vəkil tutdum, sonra da noyabrın 17-də Narkoloji Mərkəzə gedib müayinə olundum. Oranın işçiləri təəcüblənmişdilər ki, ilk dəfədir kimsə gəlib könüllü yoxlanılır. Deyə də bilmirdim ki, polislərin şərindən qorunmaq üçün buna məcburam. Mən tutulanda ilkin sənədlərdə istifadə və satış yazılmışdı. Yaxınlarım sosial şəbəkələrdə müayinənin kağızını yayandan sonra istifadəni ləğv etdilər, satışı saxladılar.” 

İlhamiz Quliyev sözünə davam edərək bildirib ki, narkotikin ona məxsus olması ilə bağlı etirafedici video çəkmək istəyiblər: “Mən orda da demişəm ki, bu narkotik mənim deyil, üzərimə qoyulub. Möhtərəm hakim, o videoya bu zalda da baxıldı, siz də baxdınız. Narktoki üzərimə burada şahid kimi ifadə verən 28-ci polis bölməsində Nicat Abdullayev qoymuşdu. Ancaq mən videoda onun adını çəkə bilmədim, çünki daha çox işgəncələrə məruz qalacaqdım”. 

İhamiz Quliyev özünə xəsarət yetirməsi ilə bağlı iş materiallarında yazılanların da məhkəmədə elə şahid polislər tərəfindən ifşa olunduğunu deyib: “Sənədlərdə yazılıb ki, guya bədənimdəki izlər özümə xəsarət yetirməyim nəticəsində əmələ gəlib. Ancaq sonradan fikirləşiblər ki, adam öz belinə, kürəyinə necə xəsarət yetirə bilər? Ona görə də polis əməkdaşı Rəşad Bəşirov burda bildirdi ki, guya özümü ora-bura çırpmaqdan yaranıb. Yenə yalan danışırdı. Yadınızdadırsa, öz dediyinə özü də güldü, siz də onun üstünə acıqlandınız”. 

İlhamiz Quliyev üzünü məhkəmə salonunda əyləşən anasına tutub: “Mən ömrümdə heç olmasa bircə dəfə patı istifadə etsəydim, anam bu məhkəmə zalına gəlməzdi”. 

Anası ona “Möhkəm ol oğlum, kişinin başına iş gələr” deyib. 

İ.Quliyev sadəcə “Ana, görürsən ki, qadının da başına iş gəlir, sən də möhkəm ol”, söyləyib, qəhərləndiyi üçün sözünü sona çatdıra bilməyib. Sonra üzünü hakimə tutaraq ədalət gözləməsə belə, bəraəti öz haqqı hesab etdiyini deyib. 

Beş dəqiqəlik müşavirədən sonra hakim hökmü elan edib. Məlum olub ki, İlhamiz Quliyevə qarşı irəli sürülmüş 234.4.3 maddəsi (satış məqsədilə külli miqdarda narkotik əldə edib saxlama, gəzdirmə) 234.1-1-ə (satış məqsədi olmadan külli miqdarda narkotik əldə edib saxlama, üzərində daşıma) tövsif edilib. İlhamiz Quliyev cəzasını ümumi rejimli cəzaçəkmə müəssisəsində çəkməklə 3 il müddətinə azadlıqdan məhrum edilib. 

Bundan əvvəlki məhkəmə iclasında dövlət ittihamsıçı İlhamiz Quliyevə qarşı satış məqsədilə külli miqdarda narkotik əldə etmə ittihamının məhkəmədə sübuta yetirildiyini bildirmişdi və 7 il müddətinə azadlıqdan məhrum edilməsini istəmişdi. 

İlhamiz Quliyev ötən il dekabrın 4-də həbs olunub və Cinayət Məcəlləsinin 234.4.3-cü maddəsi ilə ittiham olunurdu. Özü ittihamları qəbul etmir və həbsini polisdəki qanunsuzluqlarla bağlı Abzas Media-ya verdiyi müsahibə ilə əlaqələndirir. Daxili İşlər Nazirliyi isə bu deyilənlərin özünü müdafiə xarakteri daşıdığını bildirir.