Rusiya Prezidenti Vladimir Putin Ermənistanın Baş naziri Nikol Paşinyanla bu gün, oktyabrın 31-də ikitərəfli görüş keçirib.

TASS-ın məlumatına görə, görüşü giriş sözüylə açan Putin bildirib ki, Azərbaycanla Ermənistan arasındakı münaqişə onilliklərdir, davam edir. 

"Buna nə vaxtsa son qoyulmalıdır. Bilirəm ki, bunun üçün sizin siyasi iradəniz var. Biz bunu hər cür dəstəkləyirik, - deyə Rusiya lideri vurğulayıb və əlavə edib: Biz həmişə ondan çıxış edirik ki, Ermənistan bizim strateji tərəfdaşımızdır, müttəfiqimizdir, KTMT liderləri ilə görüşdə dediyim kimi, qədim zamanlardan, necə deyərlər, bu günə qədər. Ona görə də bizim üçün bu hələ də xüsusi bir vəziyyətdir. Mən çox ümid edirəm ki, bu gün biz nizamlanma istiqamətində irəliyə doğru addımlar ata biləcəyik".

https://toplum.tv/siyaset/qarabag-seperatcilari-artsax-in-azerbaycanin-terkib-hissesi-sayilacagi-istenilen-sened-redd-edilecek

Paşinyan isə çıxışında növbəti dəfə Qarabağ məsələsində Ermənistanla Azərbaycan arasında münasibətlərin qurulması üçün Rusiyanın təklif etdiyi yanaşmaların Yerevan üçün məqbul olduğunu bildirib: "Ermənistan Rusiyanın təklif etdiyi prinsiplər əsasında Azərbaycanla dövlətlərarası münasibətlər qurmağa razıdır və bunu üç ölkə liderinin Soçi görüşündə təsdiqləməyə hazırdır".

Bununla belə, Baş nazir qeyd edib ki, delimitasiya üzrə işlərin başlanmasından əvvəl Ermənistan və Azərbaycan sərhədində təhlükəsizliyin gücləndirilməsi zəruridir. 

“Azərbaycan qoşunlarının razılaşmalara zidd olaraq bu ilin martında işğal etdikləri Dağlıq Qarabağdakı Rusiya sülhməramlılarının məsuliyyət zonasından çıxarılması məsələsi bizim üçün çox vacibdir", - deyən Paşinyan onu da əlavə edib ki, Ermənistan istənilən an Azərbaycanla regional kommunikasiyaların qarşısını almağa hazırdır.

Nikol Paşinyan həmçinin Ermənistan ərazisindən keçən kommunikasiyaların rəsmi Yerevanın nəzarətində olmalı olduğunu vurğulayıb. 

Bu gün Vladimir Putinin azərbaycanlı həmkarı İlham Əliyevlə də ikitərəfli görüşü planlaşdırılır. Bundan sonra isə üçtərəfli görüş baş tutacaq. 

Üçtərəfli görüşdən sonra tərəflərin hansısa bəyanat verib-verməyəcəyi hələlik məlum deyil.