Bakıda həbsdə olan Qarabağdakı separatçıların keçmiş "dövlət naziri"  Ruben Vardanyan işinə baxan hakimlərdən narazıdır. 

Onun fikrincə, Bakı Hərbi Məhkəməsinin sədri Zeynal Ağayev, eləcə də Anar Rzayev və Camal Ramazanovdan ibarət hakimlər kollegiyası məhkəmə prosesini obyektiv və ədalətli aparmırlar (Azadlıq Radiosu).

R.Vardanyan məhkəmə tərkibinə yazılı şəkildə etdiyi etirazında göstərib ki, məhkəmə prosesi başlayandan bir sıra vacib vəsatət heç bir tutarlı səbəb göstərilmədən təmin edilməyib. 

O, həmin hakimlərin sonda obyektiv və ədalətli hökm verəcəyinə şübhə etdiyini vurğulayıb.

Hakimlərə etirazı onun vəkili Avraam Berman da müdafiə edib. Ancaq ittiham və zərərçəkmiş tərəfi təmsil edən şəxslər hakimlərə etirazla razılaşmayıblar.

Baş prokurorun köməkçisi Vüsal Əliyev deyib ki, bu məhkəmə tərkibinə etiraz etmək üçün əsas yoxdur, ona görə Vardanyanın etirazı baxılmamış saxlanmalıdır.

Azərbaycan dövləti adından zərərçəkmişin nümayəndəsi qismində prosesdə təmsil olunan Nazirlər Kabineti Aparatının rəhbəri Rüfət Məmmədov da eyni fikri səsləndirib.

Hakimlər R.Vardanyanın etirazının baxılmamış saxlanmasına qərar veriblər.

R.Vardanyanla yanaşı, hazırda Bakıda həbsdə olan Qarabağ separatçıları – "Dağlıq Qarabağ Respublikası"nın prezidenti olmuş Arayik Harutyunyan, Arkadi Qukasyan, Bako Sahakyan, keçmiş "xarici işlər naziri" Davit Babayan, "parlament sədri" Davit İşxanyan və digərlərindən ibarət daha 15 nəfərin də məhkəməsi gedir. Onların da işinə eyni hakimlər kollegiyası baxır. Fərq yalnız ondadır ki, R.Vardanyan tək, onlarsa birlikdə mühakimə olunurlar.

Bu cinayət işi üzrə zərərçəkmiş qismində tanınan şəxslərin sayı yarım milyon nəfərdən çoxdur. Onlar Qarabağ müharibəsində həyatını itirənlərin hüquqi varisləri, xəsarət alanlar, məcburi köçkün olanlar və başqa şəxslərdir. Nazirlər Kabineti Aparatının rəhbəri Rüfət Məmmədov da Azərbaycan dövləti adından zərərçəkmiş qismində məhkəməyə qatılıb.

Harutyunyan və onunla mühakimə olunan daha 14 nəfərə 2 min 548 epizod üzrə terrorçuluq, soyqırımı, təcavüzkar müharibə başlama, işgəncə, qəsdən adam öldürmə də daxil, onlarla maddə ilə ittiham verilib. Bu maddələrdə 20 ilədək və ya ömürlük həbs cəzası nəzərdə tutulub.