Azərbaycanda uşaq bağçalarında yerlərin sayı məktəbəqədər yaşlı uşaqların sayından 4,5 dəfə azdır. 

Dövlət Statistika Komitəsinin saytında olan məlumata görə, əhalinin tərkibində 0-4 yaşlı uşaqların sayı 657 400 nəfər olub. 

Körpələri çıxsaq, hazırda bağça yaşında sayılan, 2017-2020-ci illlərdə doğulan uşaqların sayı isə 406 732 nəfərdir. 

2021-ci ilin məlumatına görə, məktəbəqədər təhsil müəssisələrində yerlərin sayı 146 744 ədəd olub. Bu müəssisələrə 126 509 nəfər uşaq cəlb edilib. 

https://toplum.tv/multimedia/tehsil-naziri-gender-balansi-haqqinda-biz-patriarxal-cemiyyetde-yasayiriq
 
Ümumilikdə, rəsmi statistikaya görə, 1-5 yaşlıların cəmi 32%-i məktəbəqədər təhsilə və məktəbə hazırlığa cəlb olunub. 

Təhsil naziri Emin Əmrullayev keçirdiyi brifinqlərin birində "Təhsilin keyfiyyətinin artırılmasında məktəbəqədər təhsil müəssisələri (uşaq bağçaları) böyük rolu olduğunu söyləmişdi. Nazirin fikrincə, Azərbaycanda son illər bu sahədə ciddi uğurlar əldə olunub. Əhatəliliyin artırılması istiqamətində mühüm işlər görülüb. 
Rəsmi statistikadan belə çıxır ki, 530 891 bağça yaşında olan uşaq məktəbəqədər təhsildən kənarda qalır (657 400-126 509=530 891). 

Təhsil eksperti Qoşqar Məhərrəmli deyir ki, bu problemin yaxın perspektivdə müsbət mənada dəyişməsi gözlənilmir. O, mövcud durumu Azərbaycanda bağça ənənəsinin formalaşmaması ilə izah edir: 

“Sovet dövründə də məktəbəqədər təhsil prioritet hesab edilməyib. Müstəqillik illərindən sonra isə bu təhsil əsasən şəhər yerlərində populyarlaşdı. Ümumiyyətlə, məktəbəqədər təhsilin əahtəliliyi regionları, kəndləri əhatə edə bilməyib”.  

https://toplum.tv/multimedia/elmler-akademiyasini-sarsidan-qerar-alimlerin-bir-fikri-yoxdur

Bununla belə təhsil eksperti hesab edir ki, 2030-cu ilədək mövcud problem öz həllini tapa bilər: 

“Məktəbəqədər siniflər təşkil olunanda 5 yaşlılar bura cəlb edilirdi. Bu, müəyyən qədər onların məktəbəqədər təhsilə cəlb edilməsini artırdı. Prezidentin  Məktəbəqədər və Ümumi Təhsil Agentliyinin yaradılması ilə bağlı  verdiyi sərəncamda  hədəflərdən biri belə təhsil müəssisələrinin əhatəliliyinin 50% qaldırılmasıdır. Qarşıdakı 8 il üçün dövlətin strateji planı var. Bu o deməkdir ki, məktəbəqədər müəssisələrin sayının artması dövlət tərəfindən dəstəklənəcək. Çoxlu müəllimə, bəlkə yeni fakultələrin açılmasına ehtiyac olacaq. Özəl təşəbbüslər dövlət tərəfindən dəstəklənəcək"