Azərbaycandakı ümumtəhsil məktəblərində “TikTok” sosial şəbəkəsinə giriş bağlanıb. 

APA-nın xəbərinə görə, bu barədə elm və təhsil nazirinin müavini Firudin Qurbanov Milli Məclisin komitələrinin birgə iclasında çıxışı zamanı məlumat verib.

Nazir müavininin sözlərinə görə, məktəblərdə internetdən istifadə təhlükəsizlik qaydalarına uyğun şəkildə tənzimlənir. Hazırda terrorizm, zorakılıq və digər zərərli məzmunlarla əlaqəli 200-dən çox mövzu üzrə internet resurslarına giriş məhdudlaşdırılıb.

Firudin Qurbanov bildirib ki, görülən tədbirlərin əsas məqsədi uşaqların fiziki və psixoloji sağlamlığının qorunmasıdır. O qeyd edib ki, müxtəlif araşdırmalar sosial şəbəkələrdən həddindən artıq istifadənin uşaq və yeniyetmələrin psixi sağlamlığına mənfi təsir göstərə biləcəyini ortaya qoyur.

Milli Məclisin komitələri həmçinin yaş məhdudiyyəti tətbiq olunan sosial şəbəkələrin qaydalarını pozan şəxslər və platformalar üçün nəzərdə tutulan cərimələri müzakirə edib

Layihəyə əsasən, 16 yaşı tamam olmamış uşaqların sosial şəbəkələrdə fərdi hesab açması qadağan ediləcək. 16-18 yaş arası istifadəçilər üçün isə xüsusi nəzarət mexanizmləri və daha fərqli qeydiyyat qaydaları tətbiq olunacaq. Yeni tələblərin hansı platformalara şamil ediləcəyini müvafiq dövlət qurumu müəyyənləşdirəcək.

Qanun layihəsində yaş məhdudiyyəti qaydalarının pozulmasına görə, vəzifəli şəxslər 8-9 min manat, hüquqi şəxslər isə 35-40 min manat məbləğində cərimələnə bilər.

Prezident İlham Əliyev fevralın 27-də uşaqların rəqəmsal mühitdə zərərli təsirlərdən qorunması ilə bağlı sərəncam imzalayıb. Sərəncamla Nazirlər Kabinetinə sosial şəbəkələrdə qeydiyyat zamanı yaş məhdudiyyətinin tətbiqi ilə bağlı normativ hüquqi aktların hazırlanması tapşırılıb.

Ssosial şəbəkələrə yaş məhdudiyyəti tətbiq edən ilk ölkə Avstraliya olub. Ötən il qəbul edilən qərarla 16 yaşdan kiçik şəxslərin sosial media platformalarından istifadəsi qadağan edilib. Böyük Britaniya da analoji qaydaların tətbiqi imkanlarını araşdırır.