Əgər istintaq orqanı razılıq verməsə, mən regionlarda insan haqlarını müdafiə edə bilməyəcəyəm.

Bu sözləri vəkil Elçin Sadıqov Toplum Tv-yə verdiyi açıqlamasında deyib.

Binəqədi Rayon Məhkəməsi vəkil Elçin Sadıqovun barəsində həbs-qətimkan tədbiri – ev dustaqlığı şərtlərinin dəyişdirilməsinə dair müraciəti təmin etməyib.  

Vəkil öz öhdəliklərini təkcə Bakı ərazisində deyil, Azərbaycan Respublikasının bütün ərazisində yerinə yetirilməsinə icazə verilməsi ilə bağlı müraciət edib.

https://toplum.tv/mehkeme/mehkeme-ramin-haciliya-hokm-oxudu

“Vəkil bütün Azərbaycan Respublikasının bütün ərazisində səlahiyyətlidir. Ev dustaqlığı qərarı isə mənim vəkillik fəaliyyətini həyata keçirməyimə bir nömrəli maneədir. Buna görə də regionlarda insanların hüquqlarını müdafiə edə bilmirəm. Halbuki mənə qarşı saxta cinayət işi qaldırılmazdan əvvəl də regionlarda insanların hüquqlarını müdafiə etməklə məşğul idim”, - deyə vəkil bildirib.

E.Sadıqov düşünür ki, məhkəmə ona qarşı ayrı-seçkilik edib.

“Heç bir əsas gətirilmədən şikayətim təmin edilmədi. Qeyd etdilər ki, yalnız istintaq orqanının razılığı ilə bölgələrə getmək olar. Belə çıxır ki, hər işlə bağlı prokurorluğa məruzə etməliyəm. Bu isə vəkillik fəaliyyətinin müstəqil olmasını sual altına qoyur. Ev dustaqlığı qərarından bəri bir neçə işlə bağlı istintaq orqanının razılığı ilə regionlara getmişəm. Ancaq orada işlərlə tanış olmağa vaxtım olmayıb. Çünki axşam 11-in yarısı mütləq Bakıda, Yasamalda yerləşən mənzilimdə olmalıyam. Buna görə də vəkillik fəaliyyətimi keyfiyyətli və səmərəli həyata keçirə bilmirəm. İşlə tanış olmağa, hadisə yerinə baxış keçirməyə, insanlarla söhbət etməyə vaxtım olmur”.

Sadıqov məhkəmənin qərarından apellyasiya şikayəti verdiyini söyləyib..

Bu ilin sentyabrın 10-da Elçin Sadıqov və jurnalist Əvəz Zeynallı rüşvət almaqda şübhəli bilinərək saxlanılıblar. Sentyabrın 11-nə keçən gecə məhkəmə hər ikisinin barəsində həbs-qətimkan tədbiri seçib.

Bakı Apellyasiya Məhkəməsi sentyabrın 17-də E.Sadıqovu ev dustaqlığına buraxıb.

Ev dustaqlığının şərtlərinə görə təqsirləndirilən şəxs saat 23.00-dan 06.00-a kimi evdən çıxmamalıdır. Qalan vaxtda müttəhim Bakı ərazisində sərbəstdir.