Nərimanov Rayon Məhkəməsi həbsdə olan ictimai fəal Nicat İbrahimin cəzasını ağırlaşdırıb.

Məhkəmənin qərarına əsasən, Nicat İbrahim 6 ay müddətinə qapalı həbsxana rejiminə keçiriləcək.

Bu barədə həyat yoldaşı Pərvin İbrahimli “Azadlıq Radiosu”na məlumat verib.

Hakim Gültəkin Əsədovanın çıxardığı qərar Nicat İbrahimin hazırda saxlandığı 10 saylı Cəzaçəkmə Müəssisəsinin rəhbərliyinin məhkəməyə təqdimatı əsasında qəbul olunub.

Təqdimatda onun 3 il müddətinə qapalı həbsxana rejiminə keçirilməsi istənilirdi. İddia olunub ki, Nicat İbrahim cəzaçəkmə müəssisəsində daxili intizam qaydalarını dəfələrlə pozub və dava-dalaş salıb.

Həyat yoldaşı isə baş verənləri Nicat İbrahimə qarşı təqib və təzyiq kimi qiymətləndirir:

"Yenidən şərləyib həbs etməklə kifayətlənmədilər, orada da rahat buraxmırlar. İmkan vermirlər ki, verilən cəzanı rahat çəksin. Nə istəyirlər, bilmirik. Öyrədilmiş adamları göndərirlər üstünə, dava-dalaş salırlar, akt tərtib edirlər. Məhkəməyə təqdimat verməmişdən əvvəl uzun müddət karsa salıb saxlayanda bildik ki, nəsə planları var".

Pərvin İbrahimli bildirib ki, Nərimanov Rayon Məhkəməsinin qərarından apellyasiya şikayəti veriləcək.

Nicat İbrahim 2024-cü ilin sentyabrında həbs olunub. O, Cinayət Məcəlləsinin 126.2.4-cü (ümumi təhlükəli üsulla, xuliqanlıq niyyəti ilə qəsdən sağlamlığa ağır zərər vurma) və 221.1-ci (xuliqanlıq) maddələri ilə təqsirli bilinərək 6 il 6 ay azadlıqdan məhrum edilib.

Bəhmən Əliyev adlı şəxsi bıçaqlamaqda ittiham olunan ictimai fəal ittihamı rədd edir. O bildirib ki, heç kimi bıçaqlamayıb, dayandığı yerdə tanımadığı bir şəxsin hücumuna məruz qalıb. Onun sözlərinə görə, həmin şəxs özünü yerə ataraq qışqırmağa başlayıb, bundan sonra isə hadisə yerinə polis əməkdaşları gəlib.

Nicat İbrahim həbsindən bir həftə əvvəl ailəsi ilə birlikdə ölkəni tərk etmək istəsə də, hava limanından buraxılmayıb.

İctimai fəal bundan əvvəl də həbs olunub. O, 2020-ci ilin iyulunda Prezident Administrasiyasının qarşısında prezident İlham Əliyevin istefası tələbi ilə etiraz aksiyası keçirmək istəyərkən saxlanılıb və koronavirus yaymaq ittihamı ilə 1 il 3 ay azadlıqdan məhrum edilib.

Nicat İbrahim həmin ittihamı da qəbul etməyərək, etiraz aksiyası keçirmək istədiyinə görə cəzalandırıldığını bildirib. O, 2017-ci ildə polisə etiraz olaraq ağzını tikərək aclıq aksiyası da keçirmişdi.