Həbsdə olan akademik tədqiqatçı və sülh fəalı Bəhruz Səmədov Fransada yaşayan tarixçi və hökumət tənqidçisi Altay Göyüşova məktub yazıb. 

Tarixçinin avqustun 6-da sosial media hesabında ictimailəşdirdiyi məktubda B.Səmədov həbsinin akademik fəaliyyətinə zərbə vurduğunu qeyd edib. 

"Təəssüf ki, layihələrim yarımçıq qaldı. Mən sizinlə dövlət anlayışının müqəddəsləşdirilməsi və xalqın ona tabe etdirilməsi kimi məsələləri müzakirə etməyə ümid edirdim. Amma indi özümü burada tapmışam. İnanıram ki, mənə qarşı gözlənilmədən göstərilən bu qəddarlığın səbəbi həm nəzəri yanaşmam, həm də qəti mövqeyimdir. Eyni zamanda, sizin sayənizdə aldığım beynəlxalq dəstək onları daha da qəzəbləndirdi və nəticədə məni ciddi rejimli qapalı cəzaçəkmə müəssisəsində həbs cəzası ilə ən ağır şəkildə cəzalandırdılar", - o bildirib. 

B.Səmədov saxlanma şəraitinin görmə qabiliyyətini pisləşdirdiyini əlavə edib və A.Göyüşovdan bu barədə akademik ictimaiyyəti məlumatlandırmağı xahiş edib. "İstəyirəm akademik ictimaiyyət məqsədin məni zəiflətmək və sağlamlığıma geri dönməz zərər vurmaq olduğunu başa düşsün", - o əlavə edib. 

Avqustun 6-da ictimai fəal və siyasi şərhçi Rüstəm İsmayılbəyli də B.Səmədovun görmə qabiliyyətinin zəifləməsi haqda sosial media hesabında məlumat verib. Onun sözlərinə görə, bu yaxınlarda həbsxanaya göndərilən oftalmoloq B.Səmədovu müayinə edib, lakin ona göz damcısı verməklə kifayətlənib. 

"Bəhruz Umbakı həbsxanasına köçürüləndən bəri balaca, qaranlıq, televiziyası belə olmayan kamerada saxlanılır. Bu da Bəhruzun uzun illər yazı-pozu ilə məşğul olmaqdan onsuz da zəifləmiş gözlərini artıq tamamilə korluğa yaxın vəziyyətə gətirib. Onu müayinə etməyə gələn oftalmoloq da sadəcə damcı verə bilib və bildirib ki, belə şəraitdə qalmamalıdır", - o qeyd edib. 

B.Səmədov əvvəllər də saxlanma şəraitinin pisliyindən və tibbi xidmətlərə çıxış imkanının məhdudluğundan şikayət edib. O, yetərincə Günəş şüası qəbul etmədiyinə görə dərisində ekzema xəstəliyinin gücləndiyini bildirib. 

Ötən il dekabrın 1-də 11 saylı Cəzaçəkmə Müəssisəsinin rəhbərliyinin qərarı ilə B.Səmədov 1 il müddətinə qapalı rejimli Umbakı Penitensiar Kompleksinə köçürülüb.

Mayın 21-də Ali Məhkəmə onun qapalı rejimli həbsxanaya köçürülməsindən verdiyi şikayəti təmin etməyib. 

Çexiyanın Karlov Universitetinin doktorantı olan Bəhruz Səmədov Dövlət Təhlükəsizliyi Xidmətinin əməkdaşları tərəfindən 2024-cü il avqustun 21-də həbs olunub.

O, 2025-ci il iyunun 23-də Bakı Ağır Cinayətlər Məhkəməsinin hökmü ilə 15 il müddətinə azadlıqdan məhrum edilib. Sülh fəalı dövlətə xəyanətdə ittiham olunur.

Cinayət işində iddia edilir ki, o, Ermənistan xüsusi xidmət orqanları ilə əməkdaşlıq edib. Özü isə ittihamı qəbul etmir, hakimiyyətin sifarişi ilə cəzalandırıldığını deyir.