ABŞ-da mart ayında həbs olunan fələstinli fəal Mahmud Xəlil iyunun 21-də məhkəmə qərarı ilə azadlığa buraxılıb. 

Federal məhkəmə hakimi qanuni yaşayış icazəsi olan Xəlilin həbsdə saxlanılmasının əsassız olduğunu deyib. O bildirib ki, fəalın məhkəmədən qaçmağa səbəbi yoxdur və o, konkret bir zorakılıqla ittiham olunmur.  

Luiziana ştatında saxlanma məntəqəsini tərk edən Xəlilin yaşadığı Nyu-York şəhərinə gedəcəyi, həyat yoldaşı və yeni doğulmuş övladına qovuşacağı gözlənilir. 

Xəlil jurnalistlərə “ədalətin bərqərar olduğunu, lakin çox uzun çəkdiyini” deyib. O, həmçinin, qeyd edib ki, Prezident Donald Trampın administrasiyası mübarizə aparmaq üçün “səhv adam” seçib. 

“İstər ABŞ vətəndaşı, istər mühacir, istərsə də bu torpaqda sadəcə bir insan olmağınız, sizin daha az insan olduğunuz anlamına gəlmir. Bu administrasiya miqrantları nə qədər başqa cür göstərməyə çalışsa da, ədalət zəfər çalacaq”, - o deyib. 

Hakim qərarında bildirib ki, dövlət Xəlili “xarici siyasətə zərər vurmaq” adı ilə deportasiya edə bilməz. Lakin o, dövlət ittihamçılarına Xəlilin “yaşıl kart” müraciətində yalan informasiya verməsinə dair sübutlar təqdim etmələri üçün vaxt verib. 

Kolumbiya Universitetində magistratura üzrə təhsilini dekabrda tamamlayan və “yaşıl kart”la ABŞ-da yaşamağa davam edən Mahmud Xəlil martın 8-i İmmiqrasiya və Gömrük İcrası (İCE) rəsmiləri tərəfindən həbs olunub.

Donald Tramp sosial şəbəkə hesabında Xəlili “radikal xarici HƏMAS tərəfdarı” adlandırıb və həbslərin davam edəcəyinə söz verib. 

Xəlil Suriyada fələstinli qaçqın ailəsində anadan olub. Onun ata-anası əslən İsrailin Tiberias şəhərindəndir. Xəlilin Kolumbiya Universitetində ictimai idarəçilik üzrə magistratura oxumağa başlaması ABŞ tərəfindən terrorçu qrup olaraq tanınan HƏMAS-ın 2023-cü ilin oktyabrında İsrailə hücum etməsinə təsadüf edib. İsrailin Qəzza zolağını bombardman etməsilə davam edən müharibə Kolumbiya və başqa universitetlərdə Fələstinə dəstək xarakterli oturaq aksiyalara təkan verib. 

O, ABŞ-da Donald Tramp hakimiyyətə gələndən bəri həbs olunan, vizası ləğv olunan və deportasiya təhlükəsi ilə üzləşən fəallardan yalnız biridir. 
Dövlət katibi Marko Rubio bildirib ki, o, 300-dən çox tələbənin vizasını ləğv edib. O iddia edir ki, Xəlil və başqaları HƏMAS qruplaşmasına dəstək olublar və buna görə də ABŞ-da yaşamağa davam edə bilməzlər.

Məhkəmə isə bundan əvvəl digər fələstinli fəal Mohsen Mahdavi və türkiyəli tələbə Rumeysa Öztürkün azadlığa buraxılmasına qərar verib.