Amerika Birləşmiş Ştatları 47 ildən sonra Suriyanı “terroru dəstəkləyən dövlətlər” siyahısından çıxarıb.

ABŞ Maliyyə Nazirliyinin rəsmi internet saytında dərc olunan qərar prezident Donald Trampın iyulun 8-də Konqresə etdiyi müraciətdən sonra başlayan 45 günlük baxış müddətinin başa çatması ilə qüvvəyə minib.

Qərardan sonra ABŞ-nin “terroru dəstəkləyən dövlətlər” siyahısında yalnız Kuba, İran və Şimali Koreya qalıb.

Vaşinqtonun bu addımı Əhməd əş-Şaraa hökuməti ilə uzun müddətdir aparılan danışıqlardan sonra atılıb. “Reuters” agentliyinin məlumatına görə, Dəməşq terror siyahısından çıxarılma müqabilində Rusiya neftinin idxalını kəskin şəkildə azaltmağa razılıq verib.

Trampın NATO Sammiti çərçivəsində Ankarada Əhməd əş-Şaraa ilə keçirdiyi görüşdə "Suriyanın yenidən qurulması yolundakı bütün maneələri aradan qaldırmaq" sözü verdiyi bildirilir.

ABŞ-nin Dövlət katibi Marko Rubio qərarın "Suriyanın beynəlxalq terrordan tamamilə uzaqlaşmaq istiqamətində atdığı konret addımlar və öhdəliklər" əsasında qəbul edildiyini vurğulayıb. O, bu addımın "Suriyanın qlobal iqtisadiyyata inteqrasiyası və xüsusi sektor investisiyalarının qarşısındakı son böyük maneənin aradan qalxması" demək olduğunu bildirib.

Dəməşq rəhbərliyi qərarı "tarixi dönüş nöqtəsi" kimi qiymətləndirib. Suriyanın Xarici işlər naziri Həsən əş-Şeybani “Reuters”ə açıqlamasında ölkəsinin 47 ildən sonra terror siyahısından çıxarılmasının "qlobal maliyyə sisteminə yenidən qoşulmaq və investisiyaların sürətlənməsi üçün son maneəni aradan qaldırmaq" mənasına gəldiyini deyib.

Vaşinqton 2025-ci ildə Suriyaya qarşı tətbiq edilən hərtərəfli sanksiyaları ləğv etsə də, ölkənin terror siyahısında qalması ABŞ bankları və beynəlxalq investorlar üçün ciddi hüquqi risklər yaratmaqda davam edirdi.

Sabiq prezident Bəşər Əsəd və ətrafı, insan hüquqlarını pozmaq ittiham edilənlər, narkotik alverçiləri və radikal qruplarla əlaqəsi olan şəxslərə qarşı hədəfli sanksiyalar isə qüvvədə qalır.

Bəşər Əsəd sonrası Suriyanın müvəqqəti dövlət başçısı olan Əhməd əş-Şaraa əvvəllər “Əl-Qaidə” ilə əlaqəli “Ən-Nusra Cəbhəsi”nin komandiri olub. Təşkilat 2016-cı ildə qlobal cihad şəbəkəsindən ayrılıb. Suriyanın terror siyahısından çıxarılması ilə “Ən-Nusra Cəbhəsi”nin də "Qlobal Terror Təşkilatı" statusu ləğv olunub.