Gürcüstanın 2030-cu ilə qədər Avropa İttifaqına daxil olması mümkündür.

Bunu, baş nazir İrakli Kobaxidze “Euronews” telekanalına müsahibəsində deyib.

Kobaxidze assosiasiyanın yeni üzvlərə yanaşmada daha çox çevikliyə ehtiyac duyduğunu bildirib:

“Biz bu məqsədə doğru davamlı şəkildə irəliləyəcəyik və ümid edirik ki, növbəti illərdə Gürcüstana münasibət daha ədalətli olacaq”, - baş nazir bildirib.

O, həmçinin Gürcüstanın Avropa bürokratiyası ilə kifayət qədər ciddi problemləri olduğunu da qeyd edib.

İrakli Kobaxidzenin sözlərinə görə, bu gün Gürcüstanla Avropa İttifaqı arasında sağlam münasibətlərin olmamasının səbəbkarı Gürcüstan deyil, Avropadır.

Aİ Gürcüstana 2023-cü ilin dekabrında namizəd statusu verib. Lakin qurum Rusiyadan təsirlənən və avtoritar olaraq gördüyü “xarici agent” qanununu qəbul etdikdən sonra Gürcüstanın üzvlük prosesini faktiki olaraq qeyri-müəyyən müddətə dondurub və maliyyə dəstəyini kəsib.

Fevralın 6-da hakim “Gürcü Arzusu” partiyasının üzvlərindən ibarət parlament etiraz aksiyalarına məhdudiyyətlər qoyan qanunvericilik paketini üçüncü oxunuşda qəbul edib.

Kortəbii toplantılar konsepsiyasını tənzimləməli olan və onların keçirilməsinə çoxsaylı məhdudiyyətlər qoyan yeni qanuna iki gün ərzində Gürcüstan parlamenti müxalifətsiz baxıb və təsdiqlənib.

Eyni zamanda, qanunlar “sahibinin əvvəlcədən yazılı razılığı” olmadan qapalı yerlərdə yığıncaq və nümayişlərin keçirilməsini qadağan edir, binaların, magistralların, körpülərin, tunellərin, yol ötürücülərinin, nəqliyyat qovşaqlarının və dəmir yollarının girişlərinin bağlanmasını qadağan edir.

Həmçinin Gürcüstanda etiraz aksiyaları zamanı pozuntulara görə cəza ağırılaşdırılr, inzibati həbs müddəti 60 günə qədər artırılacaq, xırda xuliqanlıq və vandalizmə görə cərimələr, həmçinin “siyasi və ya dövlət vəzifəsini tutan şəxsləri təhqir etməyə” görə cəza da artırılacaq.

Gürcüstanda 2024-cü ilin payızından parlament seçkiləri zamanı pozuntular və ölkə hakimiyyətinin Avropa İttifaqına doğru hərəkəti dayandırdığını açıqlaması səbəbindən siyasi böhran davam edir.