Azərbaycan Banklar Assosiasiyasının (ABA) icraçı direktoru Yunus Abdulov bildirib ki, gələcəkdə kartdan-karta əməliyyatlara tətbiq olunan limitlərə yenidən baxılması və alternativ tədbirlərin görülməsi istisna edilmir.

O, bunu avqustun 1-dən qüvvəyə minən kartdan-karta köçürmə limitləri ilə bağlı “APA-Economics”-ə açıqlamasında deyib.
Abdulovun sözlərinə görə, limitlərin tətbiqində məqsəd risklərin idarə olunmasını gücləndirmək, nağdsız ödənişlərin payını artırmaq və qanunsuz mərc əməliyyatlarının qarşısını almaqdır.
İcraçı direktor qeyd edib ki, mövcud limitlər baza xarakteri daşıyır və banklar öz risk qiymətləndirmələrinə əsasən müştərilərə fərqli yanaşma tətbiq edə bilirlər.

ABA-nın məlumatına görə, hər bir ödəniş aləti (kart) üzrə gündə maksimum 5 mədaxil əməliyyatına icazə verilir. Aylıq mədaxil limiti isə 20 min manat müəyyən edilib. Bildirilir ki, bu məhdudiyyət vəsaitin kartdan çıxarılmasına və kartdan-karta köçürmələrə şamil olunmur.

Qurum rəsmisi 5 əməliyyat limitini belə əsaslandırıb:
“Köçürmələrə hər hansı limit tətbiq edilmir. Limit yalnız mədaxil əməliyyatlarının sayına, yəni karta vəsaitin qəbuluna şamil olunur və gündə 5 əməliyyatla məhdudlaşdırılıb. Risklərin idarə olunması məqsədilə bu limitlər müəyyən edilməzdən əvvəl orta statistik göstəricilər, müştərilərin tipik davranışları, eləcə də ödəniş əməliyyatlarının sayı və məbləği təhlil olunur”.

Abdulov müxtəlif bankların kartlarından istifadə edən şəxslərə limitlərin necə tətbiq olunacağı ilə bağlı suala cavab olaraq bildirib ki, məhdudiyyətlər VÖEN və ya FİN üzrə deyil, hər bank daxilində hər bir ödəniş aləti (kart) üzrə ayrıca tətbiq edilir. Onun sözlərinə görə, sahibkarlıq hesabına bağlı kartlara edilən mədaxil əməliyyatları isə bu limitlərdən istisna oluna bilər.
İcraçı direktor əlavə edib ki, bu cür məhdudiyyətlər indiyədək də müştərilərin risk profilinə uyğun şəkildə tətbiq olunub və beynəlxalq təcrübədə də mövcuddur. 

O bildirib ki, ödəniş ekosisteminin inkişafı və beynəlxalq təcrübə nəzərə alınaraq, gələcəkdə limitlərə yenidən baxılması və alternativ tədbirlərin görülməsi istisna edilmir.

Bununla yanaşı, ekspertlər hesab edirlər ki, yeni məhdudiyyətlər ən çox kiçik onlayn satıcılara, sərbəst çalışanlara, ianə toplayanlara və kartına müxtəlif şəxslərdən mütəmadi köçürmə qəbul edən şəxslərə təsir göstərə bilər.