Azərbaycanda kartofun qiymətində artım müşahidə olunur.

Bakı sakinləri bildirir ki, bir həftə əvvələ qədər bazar və marketlərdə keçən ilə aid olan kartofun kiloqramını 1 manata almaq mümkün idisə, artıq eyni məhsulun qiyməti 1 manat 80 qəpiyə qədər qalxıb. 

Təzə kartof isə bəzi mağazalarda hətta kiloqramı 5-6 manatdan satışa qoyulur.

Dövlət Statistika Komitəsinin məlumatına görə, martda ölkə daxilində kartofun pərakəndə satış qiyməti 1 manat 25 qəpik təşkil edib. 2024-cü ilin mart ayı ilə müqayisədə, qida məhsullarının qiymətində 6,7% artım müşahidə olunub.

Kənd təsərrüfatı üzrə mütəxəssis Vahid Məhərrəmli Toplum TV-yə bildirir ki, qiymət artımının əsas səbəbi Azərbaycanın özünün kartofa olan tələbatını ödəyə bilməməsidir.

O deyir ki, adambaşına ehtiyacı və toxumluq kartofa tələbatı ödəmək üçün Azərbaycanda 1,5 milyon ton kartof istehsal edilməlidir. Lakin ötən il 998 min ton kartof istehsal olunub.

Məhərrəmli əlavə edir ki, əslində torpaq və iqlim ehtiyatları səbəbilə Azərbaycanın hətta 2 milyon ton kartof istehsal etmə potensialı var.

“Bunun üçün isə məhsuldarlığı artırmaq lazımdır. Azərbaycanda kartof üçün toxum materialları nə istehsal olunur, nə də xaricdən gətirilir. Kartof becərmək üçün adi kartof yumrularından toxum kimi istifadə olunur, ona görə də məhsuldarlıq bizdə çox aşağıdır,” mütəxəssis deyir.

Martda Antiinhisar və İstehlak Bazarına Nəzarət Dövlət Agentliyi bildirib ki, qida mallarının, o cümlədən, kartofun qiyməti “bazar prinsiplərinə uyğun olaraq tələb və təklif əsasında təsərrüfat subyektləri tərəfindən sərbəst müəyyən olunur”.

Vahid Məhərrəmli buna cavab olaraq qeyd edir ki, Azərbaycanda bazar prinsipləri işlək deyil.

“Qiymətlər lazım olduqda süni şəkildə artırılır, çünki Azərbaycan bazarında monopoliya mövcuddur. İnhisarçılar dövlətdən aldıqları ucuz kreditlər hesabına saxlama anbarları inşa edirlər, kəndlilərdən aldıqları kartofu qış mövsümünə qədər orada saxlayırlar və qiyməti də onlar diqtə edirlər. İnhisarçılar da əsasən oliqarx məmurlardır,” o qeyd edir.