“Azercell” istifadəçiləri şirkətə qarşı boykot kampaniyası başladıb. 

Buna səbəb şirkətin iyunun 2-də mobil nömrələrin aktiv qalma müddətini azaltmaqla bağlı qərarı olub. 

Qərara əsasən, iyulun 1-dən etibarən nömrənin balansına ödəmə kartı ilə 1 manat yükləndikdə nömrənin aktiv qalma müddəti 1 gün olacaq. Elektron ödəniş üsulları ilə nömrəni aktiv saxlamaq üçün isə 1 - 1,99 manat arası məbləğ yükləmək lazım olacaq. 

Hazırda qüvvədə olan tarifə əsasən isə, nömrəyə 1 - 1,99 manat yüklədikdə o, 5 gün aktiv qala bilir. 

Yeni qərarla nömrəni 2 gün aktiv saxlamaq üçün 2 - 2,99 manat, 3 gün üçün isə 
3 - 4,99 manat yükləmək lazım olacaq. Nömrə maksimum 50 gün aktiv qala bilər ki, bunun üçün də istifadəçilər ən az 50 manatından keçməli olacaq. 

Müqayisə üçün, qüvvədə olan tariflə nömrəyə 2 - 2,99 manat yüklədikdə o, 10 gün, 3 - 4,99 manat yüklədikdə 20 gün, 50 manat yüklədikdə isə 120 gün aktiv qalır. 

Boykot kampaniyasına qoşulan istifadəçilər qonşu ölkələrdəki mobil operatorların tariflərinə diqqət çəkiblər. 

Məsələn, Türkiyənin "Turkcell” mobil operatorunda nömrələrin aktiv qalma müddəti ən azı 185 gün, “Vodafone”da 180 gün, Rusiyanın “Meqafon” və Ermənistanın “Telecom Armenia” operatorlarında 90 gündür. 

“Azercell” tənqidlərə qarşılıq olaraq bildirib ki, istifadəçilər abunə olduqları tarifin abunə haqqısını ödədikdə balansa etdikləri ödəniş nominalından asılı olmayaraq, nömrənin xətti tarifin istifadə müddəti bitənədək aktiv qalacaq. “Misal olaraq, əgər nömrənizdə "Azercellim" tarifidirsə və balansınıza 2 AZN ödəniş edərək, tarifi yeniləyirsinizsə, bu zaman tarifin istifadə müddəti bitənədək (30 gün) nömrənizin xətti aktiv qalacaq”, - şirkətdən deyilib. 

Bu açıqlama da “Azercell” istifadəçilərinin hirsini soyutmayıb. 

“Dilənçi deyilsiniz, amma qiymətləriniz dilənçi kimidir! Gedin başqa ölkələrdəki qiymətlərə baxın, sonra qoyduğunuz qiymətə baxın. Utanın bir az! Millətin cibinə girməkdən başqa işiniz qalmayıb. Sizin acığınızdan “Bakcell”ə ya “Nar”a keçmək vaxtıdır! #boykotazercell”, - bir “Facebook” istifadəçisi yazıb. 

Hüquqşünas Əkrəm Həsənov mövzu ilə bağlı “Pravda.az” saytına açıqlamasında deyib ki, “Azercell”in yeni qərarı Azərbaycanda iqtisadi modelin “normal olmadığını” sübut edib. 

“Dünya ölkələrində belə model var, amma aylarla ölçülən modeldir, günlərlə yox. Bəzi ölkələrdə bəzi mobil operatorlar bunu tətbiq edir, amma hamısı yox. “Azercell”in yanaşması təəccüblüdür və  şirkətin yeni qərarı bir daha sübut etdi ki, Azərbaycanda iqtisadi model anormaldır. Aydındır, “Azercell” daha çox pul qazanmaq istəyir, buna görə xidmət haqqını artırır. İstəyir ki, müstəriləri daha aktiv olsunlar. Qanunla bu, qadağan deyil. Mobil operatorlar bizdə şərtlərini özləri müəyyən edirlər və formal olaraq inhisar yoxdur”, - o qeyd edib.