Sumqayıt Ağır Cinayətlər Məhkəməsində elə həmin məhkəmənin keçmiş hakimi İlyas Mahmudovun məhkəməsi başlayıb.

İlyas Mahmudov öz iş otağında hazırladığı və Sumqayıt Ağır Cinayətlər Məhkəməsinin möhürüylə möhürlədiyi saxta Qətnamələri vətəndaşlara  satmaqda təqsirləndirilir. İş üzrə tanınmış zərəçəkmiş tərəfsə Dövlət Sosial Müdafiə Fondudur.

Oktyabrın 31-də keçirilən birinci məhkəmə baxış iclasında vəkillər təqsirləndirilən şəxsin şüşə qəfəsdən çıxarılaraq onların yanında oturdulmasına görə vəsatət qaldırıblar. Hakim vəsatəti təmin edib. Sonra dövlət ittihamçısı ittiham aktını elan edib.

https://toplum.tv/mehkeme/prokuroru-hamam-goruntuleriyle-santaj-edenler-mehkeme-qarsisindadir

İttihamlardan biri ondan ibarətdir ki, İlyas Mahmudov Sumqayıt Ağır Cinayətlər Məhkəməsində işlədiyi müddətdə 2008-2019-cu illərdə icraatında olan bir neçə mülki iş üzrə rüşvət alaraq ədalətsiz qərar çıxarıb. Belə ki, ittihama görə, hakim İlyas Mahmudov vətəndaş Həcər Hacıyevanın “Azərişığ”a qarşı borcun silinməsi iddiasını 250 manat rüşvət qarşılığında qismən təmin edib. Müşgünaz Şükürovanın digər şəxsin torpaqdan çıxarılmasına dair iddiasını təmin etmək üçün 1000 manat alıb və ədalətsiz Qətnamə çıxarıb. Zeynəb İmayevanın digər şəxsə qarşı pul tələbinə dair iddiasını da 3500 manat alaraq təmin edib.

Başqa ittiham İlyas Mahmudovun ayrı-ayrı vətəndaşlara əmək stajı və əlilliyin müəyyən edilməsi ilə bağlı saxta Qətnamələr verməsi ilə bağlıdır.

Keçmiş hakim 18 vətəndaşa Sumqayıt şəhəri 2 saylı Tikinti Trestində, Karl Marks adına kolxozda, Bakı şəhəri 3 saylı Tikinti Trestində, Sumqayıt şəhəri Rayonlararası Tikinti Trestində, Sumqayıt şəhəri Texniki İstehsalat Komplektləşdirmə İdarəsində, Ağdam rayonu Lenin adına kolxozda və başqa idarələrdə vaxtilə əmək fəaliyyətiylə məşğul olmaları (rəngsaz, xadimə, fəhlə və sair) barədə yalan məlumatlar yazmaqla, hər birinə uzunmüddətli iş stajı qeyd etməklə saxta Qətnamələr çıxarmaqda da təqsirləndirilir.

İrəli sürülmüş ittihamlardan biri də bir neçə vətəndaşın əlil olması barədə saxta Qətnamələrə aiddir. İttiham aktında qeyd olunub ki, hakim vətəndaş Məhərrəm Məhərrəmovun Müdafiə Nazirliyinə qarşı hüquqi faktın müəyyən edilməsi iddiası üzrə guya həmin şəxsin 1992-ci ildə 1-ci Qarabağ döyüşlərində iştirak edib yaralanmasına dair saxta Qətnamə çıxarıb.

İttiham aktında göstərilib ki, İlyas Mahmudov yalan məlumatlar daxil etdiyi Qətnamələr DSMF-nin Sumqayıt, Abşeron, Zəngilan və başqa şöbələrinə təqdim edilib və icra olunub. DSMF illər ərzində saxta əlillərə və saxta əmək təqaüdçülərinə cəmi 243 min 441 manat məbləğində pensiya ödəyib.

Dövlət ittihamçısı İttiham aktının nəticəvi hissəsini elan etdikdən sonra hakim təqsirləndirilən şəxsə üz tutub.

Hakim: Özünüzü ittiham üzrə təqsirli bilirsinizmi?

Keçmiş hakim: Əlbəttə ki, yox.

Hakim: İfadə verirsizmi?

Keçmiş hakim: Mənim ifadəm geniş olacaq deyə, hazır deyiləm, hazırlaşmağa məhkəmədən vaxt istəyirəm,

Hakim: Bir neçə saat ərzində hazırlaşa bilərsizmi?

Keçmiş hakim: Yox, epizodlar çoxdur, işin həcmi böyükdür, mən ifadəmi həm də yazılı şəkildə təqdim edəcəm.

Hakim növbəti məhkəmə iclasını noyabrın 14-nə təyin etdi.

https://toplum.tv/mehkeme/selim-muslumov-isi-bir-saat-icerisinde-yaradilmis-sirketler-tikintilerden-gelen-otkatlar

İlyas Mahmudova Cinayət Məcəlləsinin 295.1 (bilə-bilə ədalətsiz hökm, qətnamə, qərardad və ya qərardad çıxarma), 308.2 (ağır nəticələrə səbəb olan vəzifə səlahiyyətlərindən sui-istifadə), 311.3.2 (təkrar rüşvət alma) və 313-cü (vəzifə saxtakarlığı) maddələri ilə ittiham elan edilməklə məhkəmənin qərarı ilə barəsində həbs qətimkan tədbiri seçilib.