Ermənistan Mərkəzi Seçki Komissiyası ölkənin sabiq prezidenti, "Ermənistan" alyansının lideri Robert Koçaryana qarşı ittiham irəli sürülməsinə rəsmi razılıq verib.

“Azadlıq Radiosu”nun Ermənistan xidmətinin verdiyi məlumata görə, qərar "Ermənistan" alyansının üzvləri Asatur Koçaryan və Ruslan Barseqyan, eləcə də "Güclü Ermənistan" blokunun üzvləri David Kazinyan və Aşot Yeqiazaryana da aiddir.

Komissiya bir neçə gündür ki, prokurorluğun müxalif siyasətçilərlə bağlı vəsatətlərini nəzərdən keçirir. 

Bildirilir ki, Robert Koçaryan vəzifə səlahiyyətlərindən sui-istifadə və çirkli pulların yuyulmasında ittiham olunur.

Vəkili Aram Orbelyanın sözlərinə görə, işlərdən biri 2004-cü ildə "Master-Class" tennis kortunun sahibi olan şirkətlə torpaq sahəsinin icarəsinə dair bağlanmış müqavilə ilə bağlıdır. Vəkil bildirib ki, Koçaryanın oğlu Sedrak Koçaryan həmin şirkətdəki payı yalnız 2008-ci ildə alıb. Həmin vaxt Robert Koçaryan artıq Ermənistan prezidenti deyildi və oğlu şirkətdəki pay üçün "kifayət qədər böyük məbləğ" ödəyib. Orbelyanın sözlərinə görə, Koçaryan ailəsinin 2004-cü ildə bağlanan müqaviləyə heç bir aidiyyəti olmayıb.

David Kazinyan isə Ermənistanın milyarder və "Güclü Ermənistan" lideri Samvel Karapetyana məxsus "Ermənistan Elektrik Şəbəkələri" şirkətinin keçmiş baş direktorudur. O, seçicilərə rüşvət verməyə hazırlıqda ittiham olunur.

Ermənistan Korrupsiyaya Qarşı Mübarizə Komitəsinin yaydığı materiallarda Kazinyanın adının keçdiyi bildirilir. İddialara görə, o, partiya tərəfdarları və onlarla əməkdaşlıq edən şəxslərlə birlikdə seçicilərə pul mükafatı verməyi planlaşdırıb. Antikorrupsiya məhkəməsi onu iki ay müddətinə həbs edib.

Prokurorluq həmçinin Asatur Koçaryan, Ruslan Barseqyan və Aşot Yeqiazaryanın həbs olunması ilə bağlı vəsatət qaldırıb.

Bundan əvvəl Robert Koçaryanın ölkədən çıxışına qadağa qoyulduğu məlum olub. Bu, onun şəxsi səfər üçün ölkəni tərk etməyə hazırlaşdığı vaxt hava limanında üzə çıxıb. 

Koçaryanın oğlu Levon Koçaryan bildirib ki, sabiq prezident Rusiyaya getməyi planlaşdırırdı.
Ermənistan Mərkəzi Seçki Komissiyası iyunun 14-də parlament seçkilərinin yekun nəticələrini açıqlayıb. Açıqlamaya görə, baş nazir Nikol Paşinyanın rəhbərlik etdiyi "Vətəndaş müqaviləsi" partiyası 49,745 faiz səslə qalib gəlib.

Samvel Karapetyanın "Güclü Ermənistan" bloku 23,271 faiz, Robert Koçaryanın "Ermənistan" alyansı isə 9,923 faiz səs toplayıb. "Çiçəklənən Ermənistan" partiyası isə 3,989 faiz səslə parlamentə keçə bilməyib.