Azərbaycan İranla quru sərhədini təxliyə məqsədilə açıb. 

İyunun 16-da Azərbaycan Xarici İşlər Nazirliyinin mətbuat katibi Ayxan Hacızadə bildirib ki, İrandakı Azərbaycan səfirliyinin əməkdaşlarının ailə üzvləri də daxil olmaqla ümumilikdə 41 nəfər Azərbaycan vətəndaşının İran-Azərbaycan sərhəddindən keçidi təmin olunub. 

Əlavə olaraq, hökumətyönlü media xəbər verir ki, Azərbaycan üçüncü ölkələrin xahişi ilə həmin ölkələrin vətəndaşlarının İran sərhədilə təxliyə olunmasını təmin edib. 

İyunun 15-də Rusiya Böyük Simfonik Orkestrinin 51 nəfərlik heyətinin İrandan Azərbaycana təxliyəsi başa çatıb. Həmin gün həm də İran neft sektorunda çalışan rusiyalı işçilər və onların ailə üzvlərindən ibarət qrup Astara sərhəd məntəqəsindən keçərək təxliyə olunub. 

Eyni zamanda, iyunun 16-a keçən gecə Portuqaliya, Filippin və Finlandiya vətəndaşları quru sərhədindən keçərək təxliyə olunub. 

Təxliyə olunanların avtobuslarla Heydər Əliyev adına Beynəlxalq Hava Limanına yola salındığı bildirilir. 

Hökumətyönlü mətbuat bildirir ki, təxliyə olunanlar üçün Azərbaycan tərəfi sərhəd buraxılış məntəqəsində çay və şirniyyat təklif olunub və hər ehtimala qarşı tibbi heyət səfərbər olunub. 

Bütün qonşularla quru sərhədlərini 2020-ci ilin martından bağlı saxlayan Azərbaycanın İran sərhədini müvəqqəti də olsa açması sosial şəbəkələrdə birmənalı qarşılanmayıb. 

Xeyli sosial şəbəkə istifadəçisi sərhədlərin hansı əsaslarla hələ də bağlı saxlanılmasını sual edib. 

Azərbaycan quru sərhədləri 2020-ci ildə koronavirus pandemiyası səbəbilə bağlasa da, Ümumdünya Səhiyyə Təşkilatı 2023-cü ildə bu pandemiyanın başa çatdığını elan edib. 

Azərbaycanda isə hələ də 3 aydan bir quru sərhədlərin bağlı saxlanılması ilə bağlı Nazirlər Kabinetinin qərarı uzadılır. Qərarda sərhədlərin epidemioloji vəziyyətə görə bağlı qaldığı deyilir. 

Hazırki qərar iyulun 1-ə qədər qüvvədədir. 

Azərbaycan Prezidenti İlham Əliyev 2024-cü ilin aprelində çıxışında sərhədlərin təkcə koronavirusa görə deyil, həm də milli təhlükəsizlik səbəbilə bağlı saxlanıldığını deyib. 

İyunun 13-də İran və İsrail arasında hərbi qarşıdurmanın başlaması ilə Azərbaycanda hökumətyönlü fiqurlar sərhədlərin təhlükəsizliyə görə bağlı saxlanması və bunun doğru qərar olduğu fikrini yaymağa başlayıb. 
 
Millət vəkili Elman Məmmədov “Pravda.az” saytına bildirib ki, hazırda sərhədlərin bağlı qalması təhlükəsizlik üçün çox vacibdir. 

“Bu vaciblik artıq təsdiqini tapmaqdadır. Həm İsrail, həm də İran tərəfi qarşılıqlı olaraq uzaqmənzilli silahlardan, təyyarələrdən, raketlərdən, pilotsuz uçuş aparatlarından, dronlardan istifadə edirlər. Nə olacağını bilmək olmaz. Hansı təhlükə gözlənilə, İranın nüvə obyektlərinə olan zərbələrdən hansı təhlükələr gələ bilər? Yaxud təhlükə hiss edib, sərhədlərimizi pozmaq fikrində olanlar nələr edə bilərlər?”, - o deyib.