Siyasət

ABŞ-İran münaqişəsindən bəri Azərbaycanda azı 220 inanclı həbs olunub

22 may, 2026
263

amerikaninsesi.org

Martın əvvəlindən bəri Azərbaycanda 220-dən çox inanclı fəalın həbs olunduğu bildirilir. Bu, Azərbaycanın Siyasi Məhbuslarının Azadlığı Uğrunda İttifaqın ölkədə siyasi məhbusların sayı ilə bağlı may ayı üçün olan hesabatında öz əksini tapıb.

Lakin siyahıda yeni həbs olunan inanclı fəallardan yalnız 30-unun adı yer alıb. Siyahının hazırlanmasında iştirak etmiş hüquq müdafiəçisi Arif Yunus “Toplum TV”-yə deyir ki, buna səbəb əksər inanclı fəalların ailə üzvlərinin həbsləri ictimailəşdirməkdən qorxmasıdır.

“İnformasiya ilə bağlı çətinlik çəkirik. İnsanlar qorxurlar. Azərbaycanda hakimiyyət hər şey edir ki, xaricə heç kim zəng eləməsin. Vaxtilə bizə məlumat verənlər indi açıq şəkildə bildirirlər ki, “biz qorxuruq, bizi çağırıblar polisə və deyiblər ki, bir də məlumat versəniz, siz özünüz həbsxanada olacaqsınız”, - o qeyd edib.

Siyahıda əvvəlki dövrlərdə həbs olunmuş inanclılarla birlikdə 182 inanclı fəalın adı yer alıb. Ümumilikdə isə siyahıda siyasi motivlərlə həbs olunduğu deyilən 328 nəfərin adı var. Hüquq müdafiəçiləri onları 12 qrup üzrə ayırıb və inanclı fəallar bu qruplar içində say etibarilə çoxluğa malikdir.

Arif Yunus inanclı fəalların kütləvi həbsini fevralın 28-də ABŞ və İran arasında başlayan münaqişə ilə əlaqələndirir. Münaqişənin başlamasından bir neçə gün sonra, martın 5-də Naxçıvana da dron hücumları həyata keçirilmişdi. İran buna görə məsuliyyəti öz üzərinə almasa da, Azərbaycan prezidenti İlham Əliyev hadisəyə görə İran rəhbərliyini kəskin tənqid etmiş, onları “nankor” adlandırmışdı.

“Bu insanlar Azərbaycan-İran münasibətlərinin qurbanlarıdır. Həmişə Azərbaycan və İran arasında münasibətlər gərginləşəndə inanclıları həbs edirlər”, - A.Yunus deyir.

Arif Yunus 2023-cü ilin əvvəlində də Tehranda Azərbaycan səfirliyinə edilən silahlı hücumdan sonra Azərbaycanda yüzlərlə inanclı şəxsin həbs edildiyini xatırladır.

Ötən ilin sonunda elan edilən amnistiya aktına daxil edilən, “siyasi məhbus” kimi tanınan şəxslərin sırasında da həmin inanclılar çoxluq təşkil edib. Belə ki, amnistiya çərçivəsində siyasi məhbus siyahısında olan 122 nəfər azad olunub, onlardan 118-i inanclıdır. Lakin azad edilən inanclıların sırasında yenidən həbs olunanlar da var.

Arif Yunusun sözlərinə görə, hökumətyönlü mətbuatda həbs edilən inanclılar “İran casusları” kimi təqdim edilsə də, onlara sonradan, əsasən, narkotiklə bağlı ittihamlar irəli sürülür. O əlavə edir ki, bunun səbəbi isə polisin həbs olunanlardan rüşvət tələb etməsidir.

“Elə bil dükandır, çağırıb deyirlər ki, yaxşı məbləğ, məsələn 5 min versən, səni “polisə müqavimət” adı ilə tuturuq - maksimum 30 sutka. Rüşvətin məbləği azdırsa, məsələn 3 mindirsə, səni narkoman kimi tuturlar”, - o bildirib.

Azərbaycan hakimiyyəti isə bir qayda olaraq ölkədə heç kimin siyasi fikirlərinə və ya fəaliyyətinə görə həbs olunmadığını deyir.


Toplum TV Azərbaycanın müstəqil xəbər platformasıdır. O, ölkədə və bölgədə baş verən siyasət, iqtisadiyyat, sosial, kriminal, gender mövzularında xəbərləri dəqiq və qərəzsiz şəkildə izləyicilərimizə çatdırır.

Şikayətlərinizi bizə göndərin: info@toplummedia.tv

Siyasət

AXCP üzvü Elnur Yusubov 30 sutka həbs edilib

16 noyabr 2026

sosial media

Azərbaycan Xalq Cəbhəsi Partiyasının (AXCP) Sabunçu rayon şöbəsinin sədri Elnur Yusubov 30 sutka inzibati həbs cəzası alıb. Partiya üzvlərinin məlumatına görə, Yusubov noyabrın 13-də İnzibati Həbs Olunanların Saxlanılma Mərkəzindən ailəsinə zəng edərək həbs olunduğunu bildirib. AXCP fəalı sosial şəbəkələrdəki paylaşımlarına görə İnzibati Xətalar Məcəlləsinin 388-1.1.1-ci maddəsi ilə təqsirli bilinib. Həmin maddə internetdə yayılması qanunla qadağan edilən məlumatların yerləşdirilməsinə görə məsuliyyət nəzərdə tutur. Yusubovun konkret hansı paylaşımına görə cəzalandırıldığı açıqlanmayıb. AXCP-dən bildirilib ki, ixtisasca diş həkimi olan Yusubov şöbə sədri vəzifəsinə yeni seçilib. Partiyanın məlumatına görə, o, sosial şəbəkələrdə hakimiyyəti tənqid edən paylaşımlar edib. Yusubovun həbsi noyabrın 12-də onun itkin düşməsi...
Siyasət

Məktəblərdə hicab qadağasına etiraz edən inanclı məhbusun döyüldüyü bildirilir

16 noyabr 2026

Foto: şəxsi arxiv

11 saylı Cəzaçəkmə Müəssisəsində saxlanılan inanclı fəal Fuad Əsgərovun aclıq aksiyası keçirdiyinə görə zorakılığa məruz qaldığı bildirilir. Bu barədə Əsgərovun yaxınlarına istinadən Müsəlman Birliyi Hərəkatı İdarə Heyətinin üzvü Əbülfəz Bünyadov məlumat yayıb. Bünyadovun sözlərinə görə, Əsgərov hicablı şagirdlərin baş örtüyünə görə dərsə buraxılmamasına etiraz olaraq oktyabrın 19-da aclıq aksiyasına başlayıb. “Ertəsi gün müəssisə rəisi Şakir Qəniyev Əsgərovu qəbul edərək ondan aksiyanı dayandırmağı tələb edib. Əsgərov bundan imtina etdikdən sonra huşunu itirənədək döyülüb”, - Bünyadov məhbusun yaxınlarına istinadən yazıb. Yaxınlarının bildirdiyinə görə, hadisədən sonra Əsgərov Penitensiar Xidmətin Müalicə Mərkəzinə köçürülüb və orada təkadamlıq kamerada saxlanılıb. Onların iddiasına əsasən, fəalın ailəsi və...

Seçilmiş Videolar

Toplum TV loqo