Məktəblərdə hicab qadağasına etiraz edən inanclı məhbusun döyüldüyü bildirilir
Foto: şəxsi arxiv
11 saylı Cəzaçəkmə Müəssisəsində saxlanılan inanclı fəal Fuad Əsgərovun aclıq aksiyası keçirdiyinə görə zorakılığa məruz qaldığı bildirilir.
Bu barədə Əsgərovun yaxınlarına istinadən Müsəlman Birliyi Hərəkatı İdarə Heyətinin üzvü Əbülfəz Bünyadov məlumat yayıb.
Bünyadovun sözlərinə görə, Əsgərov hicablı şagirdlərin baş örtüyünə görə dərsə buraxılmamasına etiraz olaraq oktyabrın 19-da aclıq aksiyasına başlayıb.
“Ertəsi gün müəssisə rəisi Şakir Qəniyev Əsgərovu qəbul edərək ondan aksiyanı dayandırmağı tələb edib. Əsgərov bundan imtina etdikdən sonra huşunu itirənədək döyülüb”, - Bünyadov məhbusun yaxınlarına istinadən yazıb.
Yaxınlarının bildirdiyinə görə, hadisədən sonra Əsgərov Penitensiar Xidmətin Müalicə Mərkəzinə köçürülüb və orada təkadamlıq kamerada saxlanılıb. Onların iddiasına əsasən, fəalın ailəsi və digər məhbuslarla əlaqə saxlamasına icazə verilməyib. Yaxınları bu məhdudiyyətin döyülmə izlərinin görünməsinin qarşısını almaq məqsədi daşıdığını düşünür.
Məlumata görə, Əsgərov səhhətində ciddi problemlər yarandığı üçün noyabrın 13-də aclıq aksiyasını dayandırıb və 11 saylı Cəzaçəkmə Müəssisəsinə qaytarılıb. Yaxınları bildirirlər ki, o, müəssisəyə qayıtdıqdan dərhal sonra rəisin otağına aparılıb, orada yaranan mübahisədən sonra isə cərimə kamerasına (“kars”) salınıb.
Onların iddiasına görə, Əsgərov bu dəfə də rəisin göstərişi ilə döyülüb, qolları qandallanaraq karserdə çarpayıya bağlı vəziyyətdə saxlanılıb.
İddialarla bağlı Penitensiar Xidmətdən münasibət öyrənmək mümkün olmayıb.
Fuad Əsgərov 2023-cü ildə narkotik vasitələrin qanunsuz dövriyyəsi ittihamı ilə həbs olunub. Yaxınları və hüquq müdafiəçiləri ittihamın saxta olduğunu, onun dini inanclarına görə hədəfə alındığını bildirirlər. Onun saxlanılarkən fiziki təzyiqə məruz qaldığı və ailəsi ilə hədələnərək ittihamı qəbul etməyə məcbur edildiyi də iddia olunub.
Toplum TV Azərbaycanın müstəqil xəbər platformasıdır. O, ölkədə və bölgədə baş verən siyasət, iqtisadiyyat, sosial, kriminal, gender mövzularında xəbərləri dəqiq və qərəzsiz şəkildə izləyicilərimizə çatdırır.
Şikayətlərinizi bizə göndərin: info@toplummedia.tv
sosial media
president.az
Vəkil: “Hicabla bağlı saxlanılan şəxslə görüşməyə imkan verilmir”
Prokuror Bəşir Süleymanlıya 9 il iş istəyib
"Meydan TV"nin həbsdə olan baş redaktoru əməliyyat olunub
ABŞ-dəki seçkilərdən sonra texnologiya şirkətləri milyardlarla dollar itirib
Siyasi məhbus kimi tanınan bir qrup şəxs: “Əliyev rejimi ölkəni həbs qəbiristanlığına çevirib”