“Azərbaycanın təcavüzü Ermənistan Silahlı Qüvvələrində aparılan islahatları pozmaq və Ermənistana silah verilməsinin qarşısını almaq məqsədi daşıyır”.

Ermənistanın Baş naziri Nikol Paşinyan hökumətin sentyabrın 29-da keçirilən iclasında belə deyib. 

“Ermənistan ərazisi işğal olunub və bizim mövqeyimiz birmənalıdır – Azərbaycan silahlı qüvvələri Ermənistan Respublikasının ərazisindən çıxarılmalıdır”, - deyə baş nazir bildirib.

Onun iddiasına görə, Azərbaycan Ermənistan silahlı qüvvələrində aparılan genişmiqyaslı islahatları pozmaq istəyir.

https://toplum.tv/dunya/ermenistan-serhedde-atisma-neticesinde-3-ermeni-herbcisinin-helak-oldugunu-bildirir

“Biz silahlı qüvvələrdə genişmiqyaslı islahatlar prosesinə başlamışıq. Azərbaycan bu cür təxribatlara əl ataraq, islahatlara mane olmağa çalışır. Təəssüf ki, onlar müttəfiqlərimizlə münasibətlərdə də müəyyən uğurlar qazanıblar. Bakı çalışır ki, Ermənistana silah-sursat verilməsin. Hətta bəzi hallarda ödənişini etdiyimiz silah-sursatlar belə bizə çatdırılmır. 

Nikol Paşinyan həmçinin sülhməramlı qüvvələrin (ATƏT, BMT) Ermənistan-Azərbaycan sərhədi boyunca yerləşdirilməsini tələb edib. 

“Bütün amillərə baxmayaraq, biz müstəqilliyimizi, suverenliyimizi və ərazi bütövlüyümüzü müdafiə etməkdə qətiyyətliyik”, - deyə o bildirib.

Bu gün, sentyabrın 29-da Ermənistan Müdafiə Nazirliyi Azərbaycanla sərhəddə atəşkəsin yenə pozulduğu, nəticədə 3 erməni hərbçinin həlak olması barədə məlumat paylaşıb.

Azərbaycan Müdafiə Nazirliyi də dünən gecə atəşkəsin pozulduğunu açıqlamış, bir hərbi qulluqçunun yaralandığını bildirmişdi.  

Tərəflər atəşkəsin pozulmasına görə məsuliyyəti bir-birilərinin üstünə atıblar.

Məsələylə bağlı Paşinyan “Twitter” səhifəsində paylaşdığı məlumatda atəşkəsin Azərbaycanda tərəfindən pozulduğunu iddia edib və bunu “Ermənistanın müstəqilliyinə, suverenliyinə və demokratiyasına qarşı hücum" kimi qiymətləndirib.

“Azərbaycan qoşunlarının geri çəkilməsi və beynəlxalq müşahidəçi missiyasının Azərbaycanın işğalından zərər çəkmiş Ermənistan ərazilərində və sərhədyanı rayonlarda yerləşdirilməsi mütləq zərurətdir”, - Paşinyan qeyd edib.