Azərbaycanda Rusiya dövlət və özəl müəssisələrinin xətti ilə keçirilməsi nəzərdə tutulan mədəniyyət tədbirləri, o cümlədən konsertlər, festivallar, tamaşalar və sərgilər ləğv edilib. 

Bu barədə iyunun 29-da Mədəniyyət Nazirliyi məlumat yayıb.

Məlumatda bildirilir ki, qərara səbəb Rusiyanın Yekaterinburq vilayətində azərbaycanlılara qarşı Rusiyanın hüquq-mühafizə orqanları tərəfindən “nümayişkarcasına törədilmiş məqsədli və mühakiməsiz qətl və zorakılıq əməlləri və bütövlükdə son dövrlərdə bu kimi halların sistematik xarakter  almasıdır”. 

Bundan əvvəl Rusiya Baş nazirinin müavini Aleksey Overçukun bu günlərdə Azərbaycana nəzərdə tutulan səfərinin ləğv olunduğu xəbəri də yayılmışdı. 

İyunun 27-də Yekaterinburqda Rusiya Federal Təhlükəsizlik Xidmətinin əməliyyatı nəticəsində iki azərbaycanlı öldürülüb, ikisi isə yaralanıb. Ümumilikdə doqquz azərbaycanlının saxlanıldığı və 10-dan çox mənzildə axtarış aparıldığı bildirilir. 

Azərbaycan Xarici İşlər Nazirliyi iyunun 28-də hadisə ilə bağlı “dərin narahatlığını bildirib” və Rusiya tərəfindən məsələ ilə bağlı “təxirəsalınmaz araşdırma aparılmasını və bu qəbuledilməz zorakılığı törədənlərin qısa müddət ərzində məsuliyyətə cəlb edilməsini” gözlədiyini qeyd edib. 

Həmin gün Rusiyanın Azərbaycandakı müvəqqəti işlər vəkili Pyotr Volokovıx hücumlarla əlaqədar Xarici İşlər Nazirliyinə çağırılıb və ona “kəskin etiraz” bildirilib. 

Rusiya Xarici İşlər Nazirliyinin sözçüsü Mariya Zaxarova isə bildirib ki, Volokovıx Rusiyanın hücumla bağlı Bakıya "lazımi izahatlarını" çatdırıb. 

Rusiya İstintaq Komitəsinin bildirdiyinə görə, əməliyyat 2001, 2011 və 2014-cü illərdə baş vermiş cinayət işlərinə görə,  "etnik cinayət qruplaşmasına qarşı" həyata keçirilib. Hansı qruplaşmadan söhbət getdiyi açıqlanmayıb. 

Saxlanılanlardan biri Vüqar Səfərov APA-ya deyib ki, onlar əvvəlcə evdə, sonra isə polis idarəsində işgəncəyə məruz qalıblar. 

"Bizi bir saat döydülər. Döyəndən sonra əllərimizi qandalladılar, apardılar Frunze 74 ünvanındakı bölməyə… Yolda bizi, qardaşımla məni bir maşına, "Qazel"ə uzandırdılar, atamı başqa maşınlar apardılar. "Qazel" içi palçıq idi, yolda bizi məcbur edirdilər ki, maşının içindəki palçığı yeyək. Deyirdilər ki, bu palçığı sizə yedirdəcəyik. Yemədiyimizə görə döyürdülər", - o xatırlayıb. 

Saxlanılanlardan Səfərov da daxil olmaqla bəziləri buraxılıb. 

Azərbaycan və Rusiya arasında gərginlik ötən ilin dekabrın 25-də AZAL təyyarəsinin Aktauda qəzaya uğramasından sonra başlayıb.

Rəsmi Bakı təyyarənin həmin gün Ukrayna dronlarından qorunan Rusiya hərbi hava qüvvələri tərəfindən vurulduğunu iddia edib. 

Azərbaycanın hökumətyönlü media orqanları isə yazıb ki, təyyarənin vurulduqdan sonra Rusiya ərazisində qəza enişi etməsinə icazə verilməyib ki, təyyarə Xəzər dənizinə düşsün və izlər itirilsin. 

Bir neçə gün sonra Rusiya Prezidenti Vladimir Putin hadisənin Rusiya ərazisində baş verməsinə görə üzrxahlıq edib, lakin üzərinə məsuliyyət götürməyib. Həmin vaxt AzTV-yə müsahibə verən Əliyev isə Rusiya “öz günahını etiraf etməli və üzr istəməlidir, günahkarları cəzalandırmalıdır və zərər çəkən sərnişin və ekipaj üzvlərinə təzminat ödəməlidir” deyib.

Hadisədən 6 aydan çox keçməsinə baxmayaraq, Rusiya Əliyevin tələblərini yerinə yetirməyib. Azərbaycan prezidenti də o vaxtdan bəri etdiyi çıxışlarda və müsahibələrdə bu mövzuya qayıtmayıb.